
यल – नेपाःया छगू जक षडक्षरी लोकेश्वर चैत्यसम्बन्धी सकतां जानकारी दुथ्याःगु सफू पिदंगु दु । यलया गोदावरी नगरपालिका–१४ बाडेगामय् छगू ज्याझ्वःया दथुइ उगु सफू विमोचन याःगु खः । उगु सफू यल क्षेत्र नं. १ व ३ पाखें प्रतिनिधिसभा सदस्यय् निर्वाचित जुयादीपिं सांसद नवराज सिलवाल व पम्फा भुसाल नापं यल क्षेत्र नं. ३ (क)पाखें प्रदेशसभा सदस्यय् निर्वाचित राजकाजी महर्जनं मंकाःकथं पितब्वज्या यानादीगु खः ।
उगु सफू लुम्बिनी बौद्ध विश्वविद्यालयपाखें षडक्षरी लोकेश्वरया सांस्कृतिक अध्ययन विषयय् विद्यावारिधि यानादीम्ह डा. दयाराम श्रेष्ठ ‘लुभुं’ च्वयादीगु खः । सफुतिइ बाडेगांया चैत्य व षडक्षरी लाकेश्वरया नापं उकिया थीथी धार्मिक व सांस्कृतिक पक्षयात कयाः विस्तृत रुपं न्ह्यब्वयातःगु दु ।
अथे हे उगु सफुतिइ पुलांगु बाडेगांया विहारनापं नेवाः समुदायं बौद्ध संस्कृतिकथं याइगु थीथी संस्कार, जात्रा, पर्व, नखःचखः व परम्पराया बारे नं विस्तृत रुपं ब्याख्या यानातःगु जानकारी ज्याझ्वलय् बिउगु खः । भाषा वंशावली, थीथी थासय् च्वंगु ल्वहंपौ, ऐतिहासिक सफू, थीथी धार्मिक ग्रन्थय् न्ह्यथनातःकथं बाडेगामय् अवस्थित बौद्ध चैत्य व षडक्षरी लोकश्वरया रुपय् स्वनिगःया प्रमुख बौद्ध चैत्य स्वयम्भू, खास्ति, नमुरायात कया कायेगु यानातःगु खँ सफुतिइ न्ह्यथनातःगु दु ।
LEAVE YOUR COMMENTS