संरक्षणया अभावय् पचली भैरव देगः जीर्ण

येँ – दँय्दसं मोहनिया झ्वलय् विशेष जात्रा यायेमाःम्ह थनया पचली भैरव द्यःया देगः संरक्षण मजुइवं जीर्ण जूगु दु । २०७२ साल बैशाख १२ गतेया तःभुखाचं क्षति जूगु देगलय् लिपांगु इलय् संरक्षण अभाव जुइवं देगः जीर्ण झन् जीर्ण जुजुं वंगु खः । पचली भैरव द्यःया जात्रा दँय्दसं मोहनिया झ्वलय् पचिम¥हः कुन्हु विशेषकथं जुइगु याना वयाच्वंगु दु । ताःई न्ह्यवंनिसें देगःया सामान्य मर्मत व जीर्णोद्वार यायेगु ज्या तकं जुइ मफुगुलिं देगःया अस्तित्व हे खतराय् लाइगु अवस्था वःगु दु ।

येँ महानगरपालिका वडा नं. १२ स्थित टेकु पचली द्यःया मूर्ति करिब निदँ न्ह्यः चिरिबाःगु व तसकं पुलां जुयाः जीर्ण अवस्थाय् लानाः स्यंगुलिं न्हूगु मूर्ति दयेकाः प्रतिस्थापन याःगु खः । उगु इलय् मूर्ति निर्माण यायेधकाः पुलांम्ह जुजु ज्ञानेन्द्रं आर्थिक ग्वाहालि याःगु खः । पचली भैरवलिसें झिंनिदँय् छकः जुजुं खड्ग हिलेगु परम्परा दया वयाच्वंगु खः । देशय् राजसंस्थाया अस्तित्व कायम जुयाच्वंगु इलय् तक थ्व प्रचलन दया वयाच्वंगु खः ।

मोहनिया इलय् विशेष यानाः पचिम¥हः कुन्हु पचली भैरव द्यःयात खतय् तयाः जात्रा यायेगु याइ । देगःया लिक्सं हे मचली भैरवया देगः नं दुसा थुकियात पचली भैरवया उत्तराधिकारी धकाः धायेगु यानाच्वंगु दु । पचली भैरवया जात्राया इलय् देगलय् च्वंगु पचली भैरवया त्यपयात दैवी शक्ति सिद्ध यायेत वा गुगुं नं भिंगु ज्या व बल प्रयोग यायेमाःगु ज्या यायेमाल धाःसा विशेष पुजा यायेगु प्रचलन दु ।