जापानं ‘नेवाः सुपरस्टार’ घोषणा याइगु

येँ – जापानय् जुइगु नेवाः नसा नखः (नेवाः फुड फेस्टिभल)या झ्वलय् नेवाः सुपरस्टारया घोषणा जुइगु जूगु दु ।
वल्र्ड नेवाः अर्गनाइजेशन (डब्ल्यूएनेओ) जापानया ग्वसालय् टोकियोया इकेगामि काइकान हलय् जुइगु नेवाः नसा नखःया झ्वलय् नेवाः संकिपाख्यःया छम्ह कलाकारयात ‘नेवाः सुपरस्टार’ घोषणा यायेत्यंगु खः । सुपरस्टार घोषित जूम्ह कलाकारयात प्रोत्साहन कथं छगू लाख तका दां बीगु खँ धाःगु दु ।

डब्ल्यूएनओ जापानं दँय्दसं थुकथं हे छम्ह कलाकारयात सुपरस्टार घोषणा यानाः सिरपाः बीगु खँ धाःगु दु ।

नेपालभाषा कला, संस्कृतिया विकासया निंतिं डब्ल्यूएनओ जापानं हरेक न्हूदँय् छगू आर्थिक सहयोग अभियान अन्तर्गत थ्व सिरपाः बीत्यंगु खः । थ्व अभियानयात सफल यायेगु निंतिं संसारन्यंकया सकलें नेपाःमिपिंत आर्थिक ग्वाहालि यायेत नं संस्थाया संयोजक सुनिलकुमार शाक्यं आह्वान यानादीगु दु ।

डब्ल्यूएनओ जापानपाखें नेपालभाषा मचा सिरपा बीगु निंतिं आःतक झिंच्याम्हेसिया ग्वाहालिं झिंच्यागू लाख दां मुंकाः अक्षय कोष नं दयेकेधुंकूगु दु ।