मंकाः खलः यलया सहलह मुँज्या
यल – नेपालभाषा मंकाः खलः यलयात न्ह्याकेगु विषयय् छगू सहलह मुँज्या जूगु दु । ‘नेपालभाषा मंकाः खलः यल न्ह्याःवनेगु लँपु’ विषयय् उगु सहलह जूगु खः ।खलःया नायः ऋषिप्रसाद श्रेष्ठया सभापतित्वय् जूगु सहलह मुँज्याय् मंकाः खलःया पुलांम्ह नायः डा. पुष्पराज राजकर्णिकार छगू ज्यापौ न्ह्यब्यादीगु खः ।
ज्यापौ न्ह्यब्वयादिसें डा. राजकर्णिकारं नेवाःतय्गु मू तातुना धइगु हे नेवाः राज्य खः धासें थुकिया निंतिं मंकाः खलकं समन्वयकारी भूमिका म्हिते फयेकेमाःगु खँय् बः बियादिल । वय्कलं नेवाः राज्यया निंतिं मंकाः खलकं आवश्यक जुल धाःसा हस्तक्षेपकारी भूमिका म्हितेत तयार जुइमाः धासें मंकाः खलकं नेपालाभाषा ख्यलय् मेपिंसं यानामच्वंगु तर, नेवाःतय्त निंतिं याये हे माःगु ज्याय् थःगु क्षमताकथं याना वनेमाःगु सुझाव नं बियादिल ।
नेवाः आन्दोलन वा छुं नं ज्याझ्वलय् ल्याय् पुस्ताया सहभागिता अप्वयेका यंकाः नेवाः आन्दोलनयात पुस्तान्तरण याना यंकेमाःगु, नेवाः गतिविधियात संचारमाध्यमय् व्यापक याना यंकेमाःगु, रिपोर्टस् क्लब थेंज्याःगु नेवाःतय् निंतिं छगू बिस्कंकथंया संस्था चायेकेमाःगु लगायतया विचाः मुँज्याय् सहभागिपिंसं प्वंकादीगु खः ।
सहलह मुँज्याय् मंकाः खलःया पुलांपिं नायः जुलुमलाल चित्रकार, सुरेश प्रधान व किरण शाक्यलिसें विपिन चित्रकार, शान्तराज शाक्य, भुवनेश्वर जोशी, चन्द्र महर्जन, रुपरत्न शाक्य, हिरारत्न शाक्य, शरणगोपाल महर्जन, रामहरि कपाली, केदार श्रेष्ठ, मोतिलाल शिल्पकार, निर्मल शाक्य सरिता महर्जन, सिल्भिया राजोपाध्याय, वदन शर्मा, शाक्य सुरेन, दिपकनर्सिंह श्रेष्ठ, ज्ञानेन्द्र शाक्य, नरेन्द्र श्रेष्ठ लगायतं थःथःगु विचाः प्वंकादीगु खः ।
ज्याझ्वलय् खलःया नायः श्रेष्ठं थःगु ल्यं दुगु कार्यकालय् थुकथंया हे सहलह व मुँज्यापाखें वःगु सल्लाह व सुझावयात आत्मसात यानाः न्ह्याः वनेगु प्रतिवद्धता प्वंकादीगु खः ।
LEAVE YOUR COMMENTS