ने. सं. ११४४ ञलाथ्व नवमी -

असनय् गाडी निषेधयात कयाः सहलह

येँ – येँया असं लागाय् प्यचाःघःचाः दुगु सवारी साधन निषेध याःगु विषययात कयाः म्हिगः छगू सहलह जुल । असनय् प्यचाःघःचाः दुगु सवारी निषेध यायेवं उकिं ब्वलंगु समस्या व उकिया समाधान विषययात कयाः सहलह जूगु खः । असंया स्थानीय थीथी झिंनिगू संस्थाया मंकाः ग्वसालय् जूगु ज्याझ्वलय् असं लागाय् गाडी निषेधं ब्वलंगु समस्यायात कयाः छगू मंकाः अवधारणा नं पित बिउगु दु ।

विज्ञप्तीइ असं लागाय् सवारी साधन निषेधं परम्परागत बजाः विस्थापन जुइगु खतरा ब्वलंगु व उकिया पलेसा उगु लागाय् तयातःगु बँपसः चिइकेमाःगु, लँ अतिक्रमण यानाः पसः कवःया सामान तयेगु निस्तेज यायेमाःगु पार्किङया सही व्यवस्थापन जुइगु नापं न्हूगु नियम हयेत स्थानीयवासी व सरोकारवाला निकायलिसें सहलह यायेमाः धयातःगु दु । स्थानीय व सरोकारावाला निकायया खँ न्यने धुंकाः महानगरीय ट्राफिक प्रहरी महाशाखाया सहप्रवक्ता डीएसपी मुकुन्द मरासिनीं गाडाी निषेधं असंया परम्परागत व्यापार विस्थापन जुइ धइगु द्वपं मिथ्या जक जूगु धासें राज्यं गुगुं नं क्षेत्रया व्यापारयात विस्थापन यायेत स्वइमखु धयादिल ।

वय्कलं असनय् गाडी निषेध यायेगु योजना विस्तृत अध्ययन याना जक लागू यानागु धासें थ्व स्वयां न्ह्यः उकथंया योजना थँबही व पशुपति लागाय् नं लागू याये धुंगु व उकिं यानाः अनया वातावरणय् हिउपाः वःगु दु धयादिल । असन–कमलाछी टोल सुधार समिति, असन–त्यौड–कुसुमबियालाक्षी टोल सुधार समिति, असन सेवा समिति, इन्द्रचोक क्लब, बालकुमारी खेल मण्डल, नरसिंह टोल सुधार समिति, भोताहिति बजार समिति, भोटाहिटी सेवा समाज, मछिन्द्र क्लब, लूनिभाः स्वास्थ्य केन्द्र, इनबहाः व ह्याउँनिभाः पुचःया मंकाः ग्वसालय् उगु ज्याझ्वः जूगु खः ।