दकलय् अप्वः सतक अनुशासन हाचां गाइगु थाय्

देय्या प्रमुख प्रशासनिक केन्द्र सिंहदरवार दुहां वनेगु मू लुखाय् हे कानून हाचां गायेगु व नियम पालना मयायेगु प्रवृत्तियात निरुत्साहित यायेत प्रहरी सक्रिय जूगु दु । लुँमधि अजिमा द्यःयाथासं सिंहदरवार पश्चिमं पृथ्वीनारायणया सालिक जुयाः राम शाहपाथपाखे वनीपिं सवारी चालकं सतक अनुशासन (लेन) हाचां गात धाःसा जरिवाना यायेगु ज्यायात प्रहरीं तीव्रता बियाहःगु दु ।

सिंहदरवारया मूलुखाय् हे सवारी चालकया नामय् जुइगु कानून हाचां गायेगु ज्यायात नियन्त्रा यायेत सुथय् व सनिलय् जक मखसे तिंन्हनसिया इलय् नं छातिइ क्यामरा घानातःपिं व ल्हातय् जरिवाना पुइकेत ह्याउँगु रसिद ज्वनाः च्वनाच्वंपिं ट्राफिक प्रहरी खंके फइ ।

गुम्हेसिनं लेन क्रम याःगु वा मयाःगु धइगु स्वयाच्वनीसा गुम्हेसिनं लेन क्रम हाचां गायाः बिसिउँ वनेत स्वःपिंत नियन्त्रणय् कयाः जरिवानाया रसिद ज्वनीम्हेसिया न्ह्यःने छ्वया बिउगु खंके फइ । न्ह्याबलें थें ट्राफिक जामया समस्या जुयाच्वनीगु उगु थासय् लिपांगु इलय् सार्वजनिक विदाया दिं बाहेक न्हियान्हिथं सतक लेन हाचां गाइपिं १५० सवारी साधनया चालकयात कारवाही याना वयाच्वनागु महानगरीय ट्राफिक प्रहरी महाशाखाया तथ्यांकं पुष्टि याः ।

वंगु शुक्रवाः जक स्वनिगलय् सतक लेन हाचां गाःपिं २७४ सवारी साधनमध्ये १५० सवारी साधन सिंहदरवार न्ह्यःने जूगुलिइ कारवाहीइ लाःपिं दु । न्हापा लिपाया तुलनाय् जाम जुइगु ई सुथसिया ९ निसें ११ व सनिलया ४ निसें ६ ताःईया दथुसइ सतक नियम हाचां गाइपिंत नियन्त्रणय् कायेत चिवाः कयाच्वनीपिं ट्राफिह प्रहरी अन दनाच्वंगु खनेदइ ।

उगु इलय् अन न्हय्म्ह च्याम्हया ल्याखय् प्रहरी खटे जुयाच्वंगु दइ ।सतक लेन हाचां गाःगु सवारी साधनयात ५०० तका दरिवाना याना वयाच्वंगु दु । सतक लेन हाचां गाइगुलिइ मोटरसाइकलया ल्याः अप्वः अर्थात ९० प्रतिशतं मल्याक दुगु तथ्यांकं क्यंगु दु । सतक अनुशासनयात बेवास्ता यानाः मेपिंत लिफ्यानाः सवारी साधन ब्वाकीपिं शिक्षित ल्याय्म्ह पुस्ता हे ट्राफिक प्रहरीया ज्याकुथिइ वनाः जरिवाना बुझे याइगु धलखय् दकलय् न्ह्यःने लानाच्वंगु दु ।

सिंहदरवार लिपा सतक लेन हाचां गाइपिंत जरिवाना असुल याइगु चोक धइगु थापाथली, बानेश्वर, त्रिपुरेश्वर, महाराजगंज, कोटेश्वर, माइतीघर, कलंकी, पुतली सतक खः । सीकसीकं जुइमा वा मचायेकं जुइमा सवारी चालक सतक अनुशासनय् च्वनेमाः धइगु खँयात ध्यानय् मतसे याकनं न्ह्यःने वनेत स्वइगु इलय् कारवाहीया दायराय् लायेगु यानाच्वंगु महाशाखाया प्रवक्ता प्रहरी उपरीक्षक रविकुमार पौडेलं जानकारी बियादिल ।

सतक अनुशासन हाचां गाइपिं व इमित नियन्त्रणय् कायेत स्वइपिं प्रहरीया दथुइ सिंहदरवार न्ह्यःने लँजुवां लँ त्वाःल्हाइगु थाय् (जेब्रा क्रसिङ लिक्क) न्ह्याबलें धइथें वादविवाद जुयाचवंगु खने दइ । गुलिखे चालकं धाःसा प्रहरी भत्ता नयेगु आशां अनावश्यक रुपय् दुःख बीत स्वःगु धासें आक्रोश प्वंकेगु यानाच्वंगु दु ।

महाशाखां न्हापांखुसी सतक लेन हाचां गाःम्ह चालकयात ५०० तका, निक्वःखुसी हाचां गाल धाःसा १००० तका व स्वक्वःखुसी हाचां गाल धाःसा १५०० तका जरिवाना पुइकेगु यानाच्वंगु दु । थ्व स्वयां न्ह्यः प्रहरीं सतक लेन हाचां गाःम्ह चालक वा सर्वसाधारणयात गुगु थासय् लेनया अवज्ञा याःगु खः व हे थासय् घौछितक नियन्त्रणय् कयाः सतक अनुशासन पालना बारे ज्ञान बीगु ज्याझ्वः न्ह्याकूगु खः ।

विशिष्ट व्यक्तिया नामय् गुलिखेसिनं ला सतक लेन पालना यायेगु खँ हे त्वःते ‘प्रवेश निषेध’ धकाः च्वयातःगु बोर्डयात तकं बेवास्ता यानाः ‘साइरन’ बिबिउँ मोटरसाइकल ब्वाकेगु प्रवृत्ति अप्वयाच्वंगुयात आम जनतां ययेकाच्वंगु खनेमदु । इमिसं थुकियात कानुनी राज्यया दुरुपयोग जुयाच्वंगु रुपय् कायेगु यानाच्वंगु दु ।

ट्राफिक प्रहरीया लिपांगु सक्रियतां म्होतिं नं देय्या प्रमुख प्रशासनिक केन्द्रया मूलुखा न्ह्यःने व लुँमधि अजिमा द्यःया न्ह्यःनेया लागाय् कानून परिपालनाय् योगदान जू वनीगु विश्वास याःगु दु ।

सम्बन्धित बुखँ

LEAVE YOUR COMMENTS