बालेन्द्र साहया गामय् लसता

येँ (नेपालभाषा टाइम्स)- येँ महापालिकाया मेयर पदय् बालेन्द्र साहया मत न्हियान्हिथं अप्वया वनाच्वंगु खनाः वय्कःया पुर्खौली गांया स्थानीय मनूत लय्ताःगु दु । बालेन्द्र साहया पुर्खौली गां मधेस प्रदेशय् लाःगु महोत्तरी जिल्लास्थित एकडारा गाउँपालिका वडा नं. २ खः ।

येँय् बालेन्द्रया ल्याः अप्वयाः विजय उन्मुख जुयाच्वंगु खनाः एकडारा गामय् च्वंपिं स्थानीय मनूतलिसें बालेन्द्रया थःथितिपिं तसकं लय्ताःगु खः । गामय् च्वंपिं मनूत थौंकन्हय् थःगु जिल्ला स्वयां नं राजधानी येँ देय्या मतगणना गन थ्यनाच्वन धकाः स्वयेत उत्सुक जुयाच्वंगु खनेदु ।

छुं जुयाः येँय् बालेन्द्र साह त्यात धाःसा वय्कःयात भिंतुना बीगु लागिं थुगु गामय् च्वंपिं मनूत गाडी हे रिजर्भ यानाः येँय् थ्यंक वयेगु तयारी यानाच्वंगु खँ नं सीदुगु दु । उगु गांया ल्याय्म्हत व साहया थःथितिपिं येँय् वयेत आवश्यक तयारी समेत यानाच्वंगु खँ धाःगु दु ।

बालेन्द्र साहया बाज्या मुनिलाल साह उगु गांया पुलांम्ह जमिन्दार खः । वय्कःया काय डा. रामनारायण साह ४० दँ न्ह्यः आखः ब्वनेत येँय् वःगु व लिपा थन हे इहिपा यानाः च्वनाछ्वःगु खः । वय्कः सिंहदरवारया वैद्यखानाय् ज्या यानादीम्ह आयुर्वेदिक डाक्टर खः । थौंकन्हय् गामय् रामनारायणया छेँय् गाउँपालिकाया हे ज्याकू तयातःगु दु । रामनारायण साहया निम्ह कायपिं दी । उकी मध्ये कान्छाम्ह बालेन्द्र साह खः । गामय् बालेन्द्रया छेँजःपिंसं आपालं सामाजिक ज्याखँया लागिं थःपिनि जग्गा बियातःगु खँ स्थानीय मनूतय्सं धाःगु दु ।