स्वनिगःलिसें देय्न्यंकं ख्वाउँ अप्वयेगु शुरु

येँ – मोहनि धुनेवं स्वनिगःलिसें देय्न्यंकं तापक्रम कुहां वःगु दु । मोहनि न्ह्यःतक स्वनिगलय् तांन्वःगु महसुस यानाच्वंपिं निगःवासीतय्सं आः ख्वाउँ अप्वया वंगु महसुस यानाहःगु दु । मोहनि धुनेवं स्वनिगःलिसें देय्न्यंकं देय्न्यंकं ख्वाउँ अप्वया वंगु दु । मौसम पूर्वानुमान महाशाखायाकथं ख्वाउँ अप्वया वनेवं थ्व वाःया न्हापांगु दिं स्वनिगःया तापक्रम न्यूनतम ८ दशमलव शुन्य डिग्री सेल्सियस थ्यंगु दु ।

तापक्रम कुहां वयेवं स्वनिगलय् ख्वाउँ अप्वःगु महसुस यानाहःगु खः । सुथय् व बहनिसिया इलय् ख्वाउँ अप्वःसां न्हिनसिया इलय् धाःसा तापक्रम सामान्य स्वयां थहां वंगु महाशाखां न्ह्यथंगु दु । स्वनिगःलिसें देय्न्यंकं ख्वाउँ अप्वःगु महसुस याःसां तापक्रम धाःसा स्थिर जूगु महाशाखां न्ह्यथंगु दु ।

आतकया दुने जुम्लाय् दकलय् म्हो तापक्रम मापन याःगु दुसा दकलय् अप्वः तापक्रम विरेन्द्रनगरया मापन जूगु रेकर्ड दु । महाशाखाया कथं जुम्लाय् आतकया दुने न्यूनतम तापक्रम शुन्य दशमलव ७ डिग्री सेल्सियस व अधिकतम १९ दशमलव ६ डिग्री सेल्सियस मापन याःगु दु ।
अथे हे विरेन्द्रनगरय् दकलय् अप्वः २९ दशमलव शुन्य डिग्री व न्यूनतम ९ दशमलव ७ डिग्री सेल्सियस मापन याःगु दु ।

महाशाखायाकथं थ्व वालय् आतकया दुने येँय् दकलय् न्यूनतम तापक्रम ८ दशमलव शुन्य थ्यंगु दुसा अधिकतम तापक्रम २५ दशमलव ५ डिग्रीतक थ्यंगु रेकर्ड दु । मौसम परिवर्तनय् खास हे छुं हिउपाः वःगु खने मदुसां आतकया अवस्थायात स्वयेबलय् वइगु दिनय् तापक्रम अझं कुहां वये फइगु अनुमान महाशाखां याःगु दु ।