फाइभ जी प्रविधिविरुद्ध जुही चावला अदालतय्
एजेन्सी- बलिउडया अभिनेत्री जुही चावला फाइभ जी प्रविधिविरुद्ध अदालतय् वंगु दु । जुहि चावला लिसें मेपिं निम्हेसिनं फाइभ जी प्रविधि विरुद्ध दिल्ली हाइकोर्टय् मुद्दा दर्ता याःगु खः । वीरेश मलिक व टीना वाच्छानीलिसें जुहीं फाइभ जी प्रविधि स्वास्थ्यया निंतिं गुलि तक सुरक्षित खः धयागु जाँच यायेत सरकारी संस्थायात आदेश बीत निवेदन दर्ता याकूगु खः ।
थ्यंमथ्यं ५००० पृष्ठया थ्व निवेदनय् सरकारी संस्थात डिपार्टमेन्ट अफ कम्युनिकेशसन, साइन्स एन्ड इन्जिनियरिङ रिसर्च बोर्ड, इन्डियन काउन्सिल अफ मेडिकल रिसर्च, सेन्ट्रल पोलुशन कन्ट्रोल बोर्ड लिसें छुं विश्वविद्यालय व विश्व स्वास्थ्य संगठनयात विपक्षी दयेकातःगु दु ।
निवेदनकर्तातय् वकिल दिपक खोसलां धाःकथं थ्व प्रविधि स्वास्थ्यया निंतिं गम्भीर खतरा खः । ‘उकिं गुबले तक सरकारं थ्व प्रविधिपाखें खतरा मदु धयागु पुष्टि याइमखु, उबलय् तक फाइभ जी प्रविधि दिकेमाः धयागु जिमिगु माग खः’ वय्कलं धयादीगु दु ।
जुही चावला झिदँ न्ह्यवनिसें मोबाइल टावरया रेडिएसनयात कयाः चिन्ता प्वंका वयाच्वंम्ह खः । सन् २०११ य् जुही थःगु मालाबार हिल न्ह्यःने च्वंगु छेँ स्वयां ४० मिटर तापाक च्वंगु छखा छँेय् १६ गू मोबाइल फोनया टावर तयातःगु खनेवं थुकिया रेडियसनया परीक्षण याकास्वःगु खः । उबलय् आइआइटीया छम्ह प्रोफेसरं यानास्वःगु परीक्षणय् वयागु छेँया छुं ब्व रेडिसनया कारणं असुरक्षित जूगु रिपोर्ट बिउगु खः ।
फाइभ जी नेटवर्क थौंकन्हय् भारतय् परीक्षण जुयाच्वंगु दु । थ्व नेटवर्क अमेरिका, युरोप, चीन व दक्षिण कोरियाय् धाःसा चले जुइधुंकूगु दु ।
LEAVE YOUR COMMENTS