चाँगुनारायणय् वीर अस्पताल दयेकेत ३० करोड

येँ- सरकारं ख्वपया चाँगुनारायण नगरपालिकाय् वीर अस्पताल विस्तार याइगु जूगु दु । सरकारं उकिया निंतिं ३० गू करोड तका दां नं विनियोजन याःगु दु ।

चाँगुनारायणय् वीर अस्पताल विस्तार यायेत तत्कालीन सरकारया अर्थमन्त्री विष्णु पौडेल, नेपाल स्वास्थ्य विज्ञान प्रतिष्ठानया उपकुलपति गणेशमान गुरुङ लगायत चिकित्सक व विज्ञतय् छगू पुचलं अस्पताल निर्माण यायेत्यंगु जग्गाया अनुमगन याःगु खः । वयां लिपा अस्पताल विस्तार यायेगु निर्णय याःगु खः ।

चाँगुनारायण नगरपालिका वडा नं. ११ व १४ य् लाःगु ५७० रोपनी सार्वजनिक जग्गाय् वीर अस्पताल विस्तार यायेत प्रारम्भिक ज्याया निंतिं सरकारं बजेट विनियोजन याःगु खः । प्रतिष्ठानया उपकुलपति गुरुंगं सरकारं अस्पताल विस्तारया निंतिं ३० गू करोड तका दां विनियोजन याःगु जानकारी बियादिसें उगु बजेटं अस्पतालया डीपीआर, जग्गाया सीमांकन व वातावरणीय परीक्षणया निंतिं ईआए यायेगु जुइ धयादिल ।

लिसें वय्कलं अस्पताल विस्तारया निंतिं ज्या न्ह्याः वने धुंकूगु नं धयादीगु दु । अस्पताल निर्माणया निंतिं पेप्सीकोला–मनहरा करिडोर सतक निर्माण यायेगु व उकिया निंतिं करिब ३ किमितक प्यंगू लेनया सतक नं दयेकीगु जूगु दु ।

अस्पताल निर्माण जुइगु जुइवं चाँगुनारायण नगरपालिकाया प्रमुख सोमप्रसाद मिश्रं नगरपालिका लागाय् अस्पताल निर्माणया निंतिं थःपिंसं याना वयाच्वनागु कुतः सफल जूगु धयादीगु दु । वय्कलं धयादीगु दु, ‘तःदँ न्ह्यवंनिसें थुगु लागाय् अस्पताल निर्माणया निंतिं कुतः यानाच्वनागु खः, आः वयाः थःपिंसं यानागु कुतः सफल जूगु दु ।’