चिनिया पत्रकारतय् पुचःयात लसकुस

येँ – प्रेस काउन्सिल नेपाल व नेपाल पत्रकार महासंघं नेपाः भ्रमणय् वयाच्वंपिं चिनिया पत्रकारतय् पुचःयात लसकुस याःगु दु । प्रेस काउन्सिल व महासंघया मंकाः ग्वसालय् छगू अनौपचारिक ज्याझ्वः यासें चिनिया पत्रकार पुचःयात लसकुस याःगु खः ।

चिनिया पत्रकार संघया कार्यकारी सचिव नापं भ्रमण दलया नेता पाङ ग्याङया नेतृत्वय् वःगु पत्रकारतय् पुचःयात प्रेस काउन्सिलया दुजः शुभेच्छा विन्दु तुलाधर व संगीता खड्कां खादां क्वखायेकाः लसकुस यासें प्रेस काउन्सिल नेपालया अंग्रेजी प्रकाशनया मिडिया एण्ड इथिक्स, पत्रकार आचारसंहिता, मिडिया इथिक्स नं लःल्हाःगु खः ।

प्रेस काउन्सिलया दुजः खड्कां लसकुस यासें निगू देय्या दथुइ परापूर्वकालंनिसें क्वातुगु सम्बन्धयात जीवन्त दयेकेत थवंथवय् थुकथंया भ्रमणं भाषा, साहित्य, शिक्षा व संस्कृतिया प्रवद्र्धन यायेगु ग्वाहालि जुइगु विचाः प्वंकादिल । प्रेस काउन्सिलया मेम्ह दुजः तुलाधरं चिनिया पत्रकारतय्त लसकुस याये खंगु गर्वया विषय जूगु खँ न्ह्यथँसे चिनिया नागरिकलिसे हे साक्षात्कार जूगु धयादिल ।

उगु इलय् महासंघया उपाध्यक्ष विपुल पोखरेलं नं नुगःखँ तयादीगु ज्याझ्वलय् महासंघया महासचिव रमेश विष्ट व चिनिया पत्रकार संघया कार्यकारी सचिव ग्यांगं निगू पक्षया दथुइ जूगु साझेदारी हितया सम्बन्धय् एमओयुलय् ल्हाःचिं तयादीगु खः ।

ज्याझ्वलय् चिनिया पत्रकार संघया सचिव नापं भ्रमण पुचःया नेता ग्यांगं लुमुसे च्वंगु आतिथ्यता व लसकुस ज्याझ्वःप्रति आभार प्वंकादिसें विविधतां जाःगु सुन्दर नेपाः व थनया जनताया बारे प्रचार प्रसार यायेगु योजना दुगु जानकारी बियादिसें वय्कलं चीनय् करिब १० गू लाख पत्रकारिता क्षेत्रय् आवद्ध जुयाच्वंगु व उकीमध्ये निगू लाख नीद्वलं लाइसेन्स कयातःगु जानकारी बियादिल ।