ठमेलया नाइट क्लबय् पुलांम्ह जुजुया डान्स !

येँ – पुलांम्ह जुजु ज्ञानेन्द्र शाहं येँया ठमेलय् च्वंगु छगू नाइट क्लबय् शनिवाः प्याखं हुलाच्वंगु भिडियो सार्वजनिक जुइवं उकियात कयाः गाक्कं चर्चा परिचर्चा जूगु दु । सामाजिक सञ्जालय् थुकिया व्यापक चर्चा जूगु दुसा आपालं कथंया टिकाटिप्पणी नं जूगु दु ।

ठमेलया एलओडी अर्थात लर्ड अफ द ड्रिंक्स नांगु नाइट क्लबय् शनिवाः बहनी परिवार सहित भाजु शाह थ्यनेवं अन वयाच्वंपिं मनूत सकलें अजूचाःगु खः । वय्कः भौ हिमानी लिसें म्ह्याय् व छय्पिं ज्वनाः अन झाःगु खः । वय्कःयात अन खनेवं ल्याय्म्हतय्सं ‘रातो र चन्द्र सूर्य…’ म्ये हायेकेत बिउगु खः गुकी भाजु शाह समेत ल्हाः व जँ संकाः प्याखं हुलादीगु खः ।

भौ व म्ह्याय्पिं धाःसा मज्जां हे प्याखं हुलेगु याना हल । उगु इलय् नाइट क्लबय् वयाच्वंपिं आपालं ल्याय्म्ह ल्यासेतय्सं वय्कःपिं नाप च्वनाः सेल्फी नं कायेगु ज्या यात । राप्रपाया अध्यक्ष कमल थापां भाजु शाहया थ्व ज्यायात च्वछासें जनताया सुखदुःखय् साथ बीम्ह जुजु हे नेपाःयात माःगु दु धकाः ट्वीट यानादीगु दु ।

राप्रपां जनताया नापनापं जुइम्ह जुजु माः धयाच्वंगु खँ नं थापां च्वयादीगु दु । तर सर्वसाधारण मनूतय्सं धाःसा न्हापा कायम्ह पारस शाह जक नाइट क्लबय् नापलाइगुली आः अबुम्ह नं नाइट क्लबय् खने दयेकः वल धकाः टिप्प्पणी याना हःगु दु ।