गुरुमापायात जा नकः वंबलय् तिंख्यः बन्द !

येँ – वंगु पुन्हि कुन्हु तिंख्यलय् गुरुमापायात जा नकः वंगु इलय् तिंख्यःया लुखा चायेका मबिउगु खँय् अन पाः च्वनाच्वंपिं सैनिकतलिसे ल्वापु जुल । थनया इतुंबहालंनिसें जा क्वबियाः तिंख्यलय् यंकूगु इलय् अन पाः च्वना–च्वंपिं सैनिकतय्सं तिंख्यःया लुखा चायेका मबिउगु खः । थ्व जात्रा बारे थःपिंसं मसिउ व थःपिंत उकिया बारे छुं आदेश नं मदु धासें उमिसं खापा चायेकेत अस्वीकार याःगु खः । १० मिनेट तक गुरुमापायात जा नकः वंबलय् तिंख्यः बन्द ! इनाप यानाः नं खापा चायेका मबिसेंलि स्थानीय मनूतय्सं खापा हे तछ्यायेगु कुतः याःगु खः । वयां लिपा तिनि सैनिकतय्सं तःधंगु लुखाया नापसं च्वंगु चीधंगु लुखा चायेका बिउगु खः ।

तिंख्यःयात सुयां अधिनय् मतसे खुल्ला यायेमाः धकाः माग जुयाच्वंगु इलय् सेनापाखें नेवाः जात्रा पर्व तकं न्यायेके मबीगु कथंया गतिविधि जूगु खँय् संस्कृतिह्यमितय्सं दुःख प्वंकूगु दु । तिंख्यलय् चान्हसिया पाय्छि १२ बजे गुरुमापायात जा नकेमाःगु परम्परा न्ह्याना वयाच्वंगु दु ।

थ्व स्वयां न्ह्यः इतुंबहालंनिसें २० फा जाकिया जा व छम्ह म्येय्या ला दायेकाः मनुखं तुं क्वबियाः तिंख्यः तक हःगु खः । थ्व जा क्वबिया वनीबलय् लँय् गनं दिके मजिउगु जुयाः क्वबीम्हेसित जाकि क्वबिकाः न्हय्पलाः न्ह्यःने व न्हय्पलाः लिउने ल्यांथ्यां याका स्वइ । सुनां अथे यायेफु वयात जक क्वबिकी । थुगुसी ६६ दँ दुम्ह भाजु देवरत्न महर्जन (ग्वारा दाजु) जा क्वबीत सफल जुयादीगु खः । निम्ह स्वम्हेसित याकां नं मफुसेंलि वय्कःयात पाः बिउगु खः ।

तिंख्यलय् गुरुमापाया जायागु प्रसाद कायेगु लागिं पुलांम्ह कुमारी माजु मतिना शाक्य लिसें आपालं श्रद्धालुत थ्यंगु खः । गुरुमापायात जा नकाः लिहां वःबलय् सम्बद्ध गुथियारत आः पाहाँचः¥हे शुरु जूगु भाःपाः घातुम्ये हालाः वःगु खः ।