विरोधया कारणं छाँयादेवीया उलेज्या यायेत मन्त्री मवल

येँ – थनया थँबहिली दयेकाच्वंगु छाँयादेवी कम्प्लेक्स उलेज्या यायेत पर्यटन नागरिक उड्डयन तथा संस्कृति मन्त्री वइगु धाःसां नं अन्तिमय् मन्त्री मवल । छायादेवी कम्प्लेक्स पलेस्वां पुखू मासे यानाः दयेकूगु धासें स्थानीय जनतां विरोध याःगु कारणं म्हिगः अन मन्त्री उलेज्या यायेत मवःगु खः ।

कम्प्लेक्सया उलेज्या न्ह्यः हे स्थानीय जनतां विरोध याःगुलिं संस्कृति मन्त्री रविन्द्र अधिकारी मवःगु खँ स्थानीय जनतां धाःगु दु । स्थानीय जनताया विरोधया बाबजुद नं कम्प्लेक्सया उलेज्या धाःसा जूगु खँ सीदुगु दु । कम्प्लेक्सया उलेज्या नेकपाया नेता लिसें सांसद योगेश भट्टराईनं यानादीगु खः ।

उलेज्या यायेत भट्टराई न्ह्यःनेया लुखां दुहां मवँसें लिउनेया लुखां दुहां वंगु खँ स्थानीय जनतां धाःगु दु । स्थानीय जनतां भट्टराई लिउनें दुहां वनाः उलेज्या यायेमाःगु धइगु हे थ्व गलत ज्या जूगुलिं अथे याःगु खः धाःगु दु । स्थानीय जनतां थःपिनिगु विरोध जुइक जुइकं भट्टराईनं उलेज्या याःगुया दुने छुं रहश्य दयेमाः धाःगु दु ।

परम्परगत पुखुली कम्प्लेक्स दयेकेगु ज्या दिकेत स्थानीय जनतां सर्वोच्च अदालतय् मुद्दा तयातःगु खः । मुद्दा लिपा सर्वोच्चं तत्काल निर्माण दिकेत आदेश बिउगु खःसां वेवास्ता यानाः कम्प्लेक्स दयेकेगु ज्या क्वचायेकूगु द्वपं दु ।