ने. सं. ११४४ कौलाथ्व पारू - नःलास्वनेगु

बैंकतय्के ध्यबा छाय् मंत ?

येँ – बैंक–तय्सं थःपिनि क्षमता स्वयां अप्वः लगानी याःगुलिं बैकिङ प्रणालीइ समस्या वःगु खँ विज्ञतय्सं धाःगु दु । विज्ञतय् धापू कथं बैंकतय्सं निक्षेप स्वयां अप्वः त्यासा प्रवाह याःगुलिं थ्व समस्या जूगु खः । थौंकन्हय् बैंक व वित्तीय संस्थां ७४ अर्ब ४९ करोड तका बराबरया त्यासा बिउगु दु । न्हापाया दँ स्वयां थ्व यक्व हे अप्वः खः । न्हापा दँय् उलि हे ईया दुेन १.९ प्रतिशत वृद्धि जूगु खःसा थुगुसी ३.१ प्रतिशतं वृद्धि जूगु दु ।

तर निक्षेप संकलनपाखे धाःसा बैंक व वित्तीय संस्थां खास हे प्रगति याये मफु । समिक्षाया इलय् बैंक व वित्तीय संस्थाया निक्षेप ३९ अर्ब १४ करोड तका जक वृद्धि जूगु दु । थ्व धइगु १.४ प्रतिशतं अप्वः खः । न्हापांगु दँय् उगु हे इलय् २.१ प्रतिशत वृद्धि जूगु खः ।बैंकतय्सं त्यासा प्रवाह यायेत निक्षेप संकलन व त्यासाया वृद्धिदर बराबर जुइमाःगु खःसा बैंकत निक्षेप वृद्धिदरय् कमजोर जूगु व त्यासा प्रवाह अप्वः वंगुलिं बैकिङ प्रणालीइ मौद्रिक संकट ब्वलंगु खँ विज्ञतय्सं धाःगु दु ।

अप्वः धइथें पुँजी, कर्जा व निक्षेप अनुपात (सीसीडी रेसियो) ८०.२० या सीमा लिक्क थ्यनेधुंकूगु खँ बैंकरतय्सं धाःगु दु । थुकिया कारणं यानाः आः बैंकतय्सं थप लगानी यायेत तकं थाकुइगु स्थिति दु । छुं न्हिया दुने निक्षेप वृद्धि याये मफइगु अवस्था वल धाःसा गुगुं कथंया त्यासा बीत बैंकरतय्त थाकुइगु खँ धाःगु दु ।
मेखे राष्ट्र बैंकं थज्याःगु अवस्था वःगुया दोष बैंकतय्त हे बिउगु दु ।

क्षमता स्वयां अप्वः लगानी याःगुलिं समस्या वःगु धासें आः निक्षेप अप्वयेकाः जक लगानी यायेमाःगु खँ राष्ट्र बैंकं धाःगु दु । आः नं बैंकिङ प्रणालीइ ४ खर्ब स्वयां अप्वः त्यासाया माग जुयाच्वंगु दु । मेखे बैंकरतय्सं धाःसा सरकारं विकास बजेट खर्च यायेमफुगुलिं थ्व तरलता वःगु खः धयाच्वंगु दु ।