बाजंगुरुपिंत येँ महानगरपालिकापाखें म्हतिं स्वीद्वः तका
येँ – येँ महानगरपालिकां दँय्दसं थें थुगुसी नं येँ नगरया परम्परागत बाजंगुरुपिंत हनीगु जूगु दु । थुगुसी येँ मनपां सम्मानित बाजंगुरुपिंत म्हतिं स्वीद्वः स्वीद्वः तका बीगु जूगु दु । येँ महानगर दिवसया लसताय् येँ महानगरपालिका पाखें दँय्दसं परम्परागत बाजंगुरुपिंत हनेगु याना वयाच्वंगु खःसा थगुने तक म्हतिं नीन्याद्वः तका बिया वयाच्वंगु खः ।
कन्हय् जुइगु २६ क्वःगु महानगर दिवसया झ्वलय् थौं छगू पत्रकार सम्मेलन यासें येँ महानगरपालिकाया मेयर विद्यासुन्दर शाक्यं थ्व जानकारी बियादीगु खः । कन्हय् येँया राष्ट्रिय सभागृहय् जुइगु विशेष ज्याझ्वलय् बाजंगुरुपिनि हनेज्या जुइ ।
येँ महानगरपालिकापाखें ज्यापु समुदायया परम्परागत ६३ गू गुथि, खड्गी समुदाया ६० गू गुथि, गुंला बाजंया २३ गू पुचः, येँयाःबलय् पिदनीगु पुलुकिसि, दीप्याखं, लाखेप्याखं, सवाभकू प्याखं व श्री करुणामय पँय्ताः खलःया गुरुपिंत हनेज्या याइ ।
अथेहे येँ महानगरं थुगुसी महानगर दुनेया वडात मध्ये छगू वडायात बांलाःगु ज्या याःगु आधारय् दँया वडा घोषणा नं याइगु जूगु दुसा बांलाःगु ज्या याःपिं जनप्रतिनिधि व कर्मचारीतय्त नं हनीगु जूगु दु ।
मेयर शाक्यं बियादीगु जानकारी कथं येँ नगरया न्हापांम्ह जनप्रनिर्वाचित सभापति स्व. जनकमान श्रेष्ठया नामं निम्ह जनप्रतिनिधि व निम्ह कर्मचारीयात ‘जनकमान श्रेष्ठ स्वशासन सिरपा’ बी, अथेहे सेवा प्रवाहय् निरन्तर खटे जूपिं न्याम्ह जनप्रतिनिधि व न्याम्ह कर्मचारीयात स्थानीय सेवा गौरव पदक व झिम्ह कर्मचारीतय्त उत्कृष्ट सम्मान लःल्हाइ । स्थानीय सेवा गौरव पदक म्हतिं छगू छगू लाख व सम्मान पत्रया जुइसा उत्कृष्ट सम्मान म्हतिं नीन्याद्वः तका व सम्मान पत्रया जुइ ।
ज्याझ्वलय् न्ववानादिसें मेयर शाक्यं महानगर दिवसया झ्वलय् येँ महानगरपालिकापाखें न्ह्याकीगु ‘जलास्येँ बचे यायेगु अभियान’या घोषणा जुइगु खँ नं कनादिल, अथेहे ज्याझ्वलय् येँ महानगरपालिकापाखें पिथनीगु येँयाः जात्राया सम्बन्धी अनुसन्धानात्मक सफू नं विमोचन जुइगु जूगु दु ।
महानगर दिवसया हे झ्वलय् लाकाः येँ महानगरपालिकापाखें याना वयाच्वंगु ज्याया बारे जनताया अभिमत कायेगु निंतिं स्वीगू थासय् स्वन्हु तक ‘अभिमत संकलन बुथ’ तयागु खँ नं मेयर शाक्यं कनादीगु दु । अथेहे वय्कलं येँया सतक द्वातय् ततःप्वाःगु मत तयेगु निंतिं सम्झौता जुइधुंकूगु, पशुपतिं सीम्ह छ्वयेकेगु निंतिं आधुनिक मेशिन तयेत्यनागु, येँया थीथी अस्पतालय् येँ महानगरपालिकां डाइलासिस यायेगु निसें थीथी स्वास्थ्य उपकरण ग्वाहालि याना वयाच्वनागु, येँ महानगर दुने लाःगु फुक्क धयाथें सामुदायिक स्कुल लागाया स्तरोन्नति याये धुनागु बारे नं जानकारी बियादीगु खः ।
LEAVE YOUR COMMENTS