बुंगद्यःयात भदाै २९ गते बुंगय् बिज्याकीगु

येँ- बुंगद्यःयात वइगु भदौ २९ गते बुगय् लित बिज्याकीगु जूगु दु । म्हिगः सुथय् दैवज्ञ ज्योतिषपिसं उगु साइत पिकाःगु खः । ‘आः वइगु भदौ २९ गते बुंगद्यःयात बुंगय् बिज्याकेगु साइत पिहां वःगु दु’ दैवज्ञ ज्योतिष किर्तिमदन जोशीं ‘नेपालभाषा टाइम्स’ यात कनादीगु दु ।

वंगु बिहीवाः हूलमूलया दथुइ रथ सालेगु कुतः जुइवं सरोकारवालातय् दथुइ च्वंगु बैठकं बुंगद्यःयात याकनं हे बुंगय् लितबिज्याकेगु सहमति याःगु खः । थ्व हे सहमति कथं शुक्रवाः क्षमापुजा, आइतवाः द्यः सालेगु व म्हिगः साइत पिकायेगु ज्या जूगु खः । सहमतिइ २६ गते दुने हे बुंगद्यःयात बुंगय् बिज्याकेगु धाःगु खःसां २९ गते जक साइत पिहां वःगुलिं आः उकुन्हु हे जक द्यःयात बुंगय् बिज्याकीगु जूगु दु ।

कोरोना भाइरसया संक्रमणया कारण सरकारं तयातःगु लकडाउन लिपा बुंगद्यःया जात्रा स्थगित जुया वयाच्वंगु खः । थुगुसी जात्रा यायेफइगु अवस्था मदयेवं जावलाख्यलय् भोटो क्यनेगु जात्रा लिसें द्यः सालेगु, नैंक्यालं लुइगु, मा सिमा चाःहिकेगु, याकःमिसा भुज्याः आदि फुक्क जात्रा मयाइगु जूगु खः ।

म्हीग बुंगद्यःयात सांकेतिक रुपं सालाः सुरक्षित थासय् तःगु खः । द्यःयात बुंगय् बिज्याकूगु प्यन्हु लिपा रथ स्यंकेगु ज्या शुरु जुइ । बुंगद्यःयात खुला बुंगय् खुला यलय् तयेमाःगु परम्परा दु ।