पहिचानय् आधारित संघीय गठबन्धनया मुँज्या

येँ – पहिचानय् आधारित संघीय गठबन्धनया मुँज्या नेपाः राष्ट्रिय पार्टीया ज्याकुथिइ च्वन । बैठक चिकित्सा शिक्षाया सुधारया माग यासें अनसन च्वनाच्वंम्ह डा. गोविन्द केसी नापं प्रदेश नं ४ व ६ या नामाकरणया पहिचनवेगरया जूगु धासें उकिया विरोधय् केन्द्रीत जूगु बैठक लिपा जारी छगू विज्ञप्तीइ धयातःगु दु ।

बैठकं डा. गोविन्द केसीं नेपाली जनतां स्तरीय स्वास्थ्य सेवा काये दयेमाः धइगु माग यासें १५ क्वःखुसी आमरण अनसन च्वनेमाःगु अवस्थां सत्ताधारी राजनीतिक दल जनस्वास्थ्यप्रति संवेदनशील मजूगु धइगु पुष्टि जूगु धासें थःपिनिगु गम्भिर ध्यानाकर्षण जूगु विज्ञप्तीइ धयातःगु दु ।

थ्व सन्दर्भय् वय्कःया माग पूरा यायेत व वय्कःया जीवनरक्षाया निंतिं नं सरकारं तत्काल पलाः न्ह्याकेत जोडदार माग यानाच्वना धासें अनसन च्वनाच्वंम्ह डा. केसीया जीवन उखेथुखे जुल धाःसा उकिया जिम्मेवारी नं स्वयम सरकारं हे पूर्णरुपं कायेमाःगु ख्याच्वः नं बिउगु दु ।

अथे हे प्रदेश नं. ४ या प्रदेशसभाया बैठकं उगु प्रदेशया नां पहिचानविहीन खँग्वः ‘गण्डकी प्रदेश’ व प्रदेश नं. ६ या नां ‘कर्णाली प्रदेश’ धकाः नामाकरण याःगुलिइ नं थःपिनिगु गम्भिर ध्यानाकर्षण जूगु धासें थ्व सन्दर्भय् ४ नं प्रदेशया नां ‘तमुवान–मगरात’ व प्रदेश नं. ६या नां ‘खसान प्रदेश’ तयेत माग याःगु दु ।

बैठकं अति कम आय दुगु नेपाः थेंज्याःगु गरिब देशय् वस्तु व सेवाय् तीव्र रुपं याःगु मूल्यवृद्धिं गरिब जनता म्वायेत झन थाकुगु अवस्थाय् थ्यंकूगु तथ्ययात नजरअन्दाज याःगु धासें गठबन्धनं सरकारया उगु पलाःयात कयाः नं घोर विरोध याःगु दु ।

बैठकय् पहिचानय् आधारित गठबन्धनय् दुथ्याःगु नेपाः राष्ट्रिय पार्टी, सामाजिक लोकतान्त्रिक पार्टी, नेपाल, खम्बुवान राष्ट्रिय मोर्चा, संघीय लोकतान्त्रिक राष्ट्रिय मंच, खसान राष्ट्रिय संघर्ष समितिया नेतातय् सहभागिता दुगु खः ।