नेपाः व इटालीया वरिष्ठ चित्रकारतय् मंकाः चित्रकला ब्वज्या क्वचाल

येँ – नेपाल व इटालीया वरिष्ठ चित्रकारतय् थन जुयाच्वंगु मंकाः चित्रकला ब्वज्या क्वचाःगु दु । वंगु कात्तिक १० गते निसें १४ गतेतक न्यान्हुयंकं जूगु चित्रकला ब्वज्याय् निगू देय्या वरिष्ठ चित्रकारलिसें चित्रकलाया प्राध्यापकपिनिगु चित्रकला, मूर्तिकला, थांका ब्वज्याय् तयातःगु खः । अथे हे उगु ब्वज्याय् काष्ठकला, ल रंगया चित्र, स्केचलिसें थांका सम्बन्धी ऐतिहासिक कला नं तयातःगु खः ।

मोहनि, स्वन्ति, नेपाल संवत् न्हूदँ व छठ पर्वया लसताय् लाकाः उगु चित्रकला ब्वज्या थनया थँबहिलिइ च्वंगु ऊड ग्यालरीइ जूगु खः । आयोजक संस्थां सामूहिकं समसामयिक व समावेशी कथं जूगु चित्रकला ब्वज्याया नांयात ‘कस्मोपोलिटान आर्ट एक्जीविसन’ बियातःगु खः ।

उगु ब्वज्याय् वरिष्ठ चित्रकार वत्सगोपाल वैद्य, काष्ठकलाया वरिष्ठ मूर्तिकार पुण्यराज वज्राचार्य, इटालीया वरिष्ठ चित्रकार नापं प्रोफेसर ज्योभ्न्ना कारुसो, कार्लुसियो सान्गाट्टी, श्रीजन राजभण्डारी, इरिना ताम्राकार महर्जन, रवी श्रेष्ठ, सप्तराज वज्राचार्यपिनिगु चित्रकला तयातःगु खः । ब्वज्याय् तयातःगु चित्रकला व मूर्ति मीगु व्यवस्था नं यानातःगु खः ।