यलया नेपालभाषा पाठ्यसफू बारे सहलह
यल (नेपालभाषा टाइम्स)- यल महानगरपालिकां स्कुलय् लागू याःगु स्थानीय पाठ्यक्रमया पाठ्य सफूयात कयाः सहलह जूगु दु । मंगलवाः यलया पाटन हाइस्कूलय् पाठ्य सफू निर्माण समिति व थीथी स्कूलया शिक्षक लिसें नेवाः खलः पुचःया प्रतिनिधिपिनि दथुइ पाठ्यसफूयात कयाः सहलह जूगु खः ।
सहलहय् न्ववानादिसें पाठ्यसफू निर्माण समितिया सहसंयोजक तुलसीलाल सिंहं मस्तय्त अःपुक नेपालभाषा स्यनेगु लिसें नेवाः तजिलजि, यल महानगरया थाय्बाय् बारे जानकारी बीगु ल्याखं सफू तयार यानागु खँ कनादिल । थ्व झ्वलय् वय्कलं संविधान कथं छगू तगिंनिसें स्थानीय पाठ्यक्रम ब्वंके दइगु जूसां क्वय्या तगिंनिसें हे ब्वंकायंकल धाःसा लिपा थ्यंक अःपुइ धयागु यल महानगरपालिकाया मेयर चिरिबाबु महर्जनया बिचाः कथं बाल–विकास तगिं (नर्सरी) निसें हे ब्वंकेगु कथं पाठ्यसफू तयार यानागु खँ कनादिल ।
यल महानगरपालिकाया नगर परिषद्ं यल महानगर दुनेया सामुदायिक व निजी स्कूल फुक्क थासय् बालबिकास तगिंनिसें स्वंगू तगिं तक अनिवार्य कथं नेपालभाषां स्थानीय पाठ्यक्रम लागू यायेगु निर्णय याना तयेधुंकूगु दु । थ्व निर्णय कथं यल महानगरपालिकाया शिक्षा महाशाखा–या संयोजक महेन्द्रबहादुर कार्कीया संयोजकत्वय् पाठ्यसफू निर्माण समिति नीस्वनाः ज्या न्ह्याकूगु खः । समितिं ‘यल ः ललितकलाया देय्’ नामं पाठ्यसफू तयार यायेधुंकूगु दु ।
सहलह ज्याझ्वलय् सभापतिया थासं न्ववासें संयोजक कार्कीं थःपिंसं नेवाः भाय् मसिउगुलिं सफू तयार यायेत व्यवस्थापनया ज्या यानाच्वनागु व सहसंयोजक तुलसीलाल सिंहया पुचलं पाठ्यसफू तयार याःगु खँ कनादिल ।
पाठ्यसफू निर्माण समितिइ शिक्षा महाशाखाया नवराज रिजाल सचिव कथं व जीवनकुमार महर्जन, दीपक तुलाधर, एलिना महर्जन व सविना महर्जन दुजः कथं दुथ्यानाच्वंगु दु ।
LEAVE YOUR COMMENTS