नेपाली चिकित्सकतय् पाखें स्येँया सफल प्रत्यारोपण

येँ (नेपालभाषा टाइम्स)÷ नेपाःया चिकित्सकतय् पाखें नेपालय् हे स्येँ (कलेजो)या प्रत्यारोपन यायेत ताःलाःगु दु । शिक्षण अस्पताल महाराजगञ्जय् नेपाःया जक चिकित्सकतय्सं न्हापांखुसी स्येँया सफल प्रत्यारोपन याःगु खः । थ्वयां न्ह्यः नेपालय् स्येँया प्रत्यारोपन जूसां भारतीय चिकित्सकतय् ग्वाहालिं जुयाच्वंगु खः । आः नेपाली चिकित्सकतय्सं हे प्रत्यारोपण यायेत ताःलाःगु खः ।

शिक्षण अस्पतालया स्येँ प्रत्यारोपण युनिटया प्रमुख प्रा.डा. रमेशसिंह भण्डारीया नेतृत्वय् वंगु पुस २७ गते ४१ दँया छम्ह मिजंया स्येँ प्रत्यारोपण याःगु खः । थुकिया जानकारी धाःसा बिहिवाः जक सार्वजनिक याःगु खः । डा. भण्डारीं फेसबुकय् छगू पोस्ट यासें थुकिया जानकारी बिउगु खः । उम्ह मिजंयात ४० दँ दुम्ह वया हे कलातं स्येँ दान बिउगु खः । स्येँ प्रत्यारोपण याःगु नीन्हु लिपा विरामी डिस्चार्ज जूगु खँ डा. भण्डारीं न्ह्यथंगु दु । विरामी डिस्चार्ज जुइधुंकाः जक थ्व खँ सार्वजनिक याःगु खः ।

राससलिसे खँ ल्हासें डा. भण्डारीं नेपालय् हे झीसं स्येँ प्रत्यारोपण यायेत सफल जूगु धासें नेपाली चिकित्सकतय्सं हे स्येँ प्रत्यारोपण यायेफु धयागु आत्मविश्वास जूगु खँ धयादीगु दु । ‘थ्वयां न्ह्यः विदेशी चिकित्सकतय् ग्वाहालिं जक स्येँ प्रत्यारोपण जुया वयाच्वंगु खःसा आः नेपाली चिकित्सकतय् पाखें हे सफल प्रत्यारोपण जूगु दु ।’

वय्कःया कथं महाराजगञ्ज अस्पतालय् स्येँ प्रत्यारोपण जूगुया थ्व झिंछक्वःगु सफल कुतः खः । थ्वयां न्ह्यः जूगु झिगू प्रत्यारोपणय् विदेशी चिकित्सकतय् ग्वाहालि दुगु खः । डा. भण्डारीं आः स्यँे दान बिउम्ह व दान काःम्ह निम्हेसियां स्वास्थ्य बांलाःगु खँ धयादीगु दु । दान बिउम्ह कलाःम्हेसित झिन्हु लिपा हे अस्पतालं डिस्चार्ज याःगु खः ।
स्येँ प्रत्यारोपणया निंतिं न्यय्म्ह चिकित्सक व स्वास्थ्यकर्मीतय् पुचलं झिंनिघौ बिक शल्यक्रिया याःगु खः । महाराजगञ्ज अस्पतालय् स्येँ प्रत्यारोपण यायेत २५ निसें ३० लाख तका तुइगु खँ धाःगु दु । विदेशय् प्रत्यारोपण यायेबलय् छगू करोड तका तक खर्च जुइगु याः ।

नेपालय् शिक्षण अस्पताल महाराजगञ्जय् व मानव अंग प्रत्यारोपण केन्द्र ख्वपय् जक स्येँया प्रत्यारोपण याः । प्रत्यारोपण केन्द्रय् सन् २०१६ निसें स्येँ प्रत्यारोपण सुरु जूगु खःसा शिक्षण अस्पतालय् सन् २०१९ निसें सुरु जूगु खः ।

 

सम्बन्धित बुखँ

LEAVE YOUR COMMENTS