ने. सं. ११४३ ञलागा चौथी -

बसन्तपुलिइ दुहां वइपिं पर्यटकत अप्वल

येँ – तःभुखाचं क्षतिग्रस्त जूगु थनया बसन्तपू–हनुमानध्वाखा लाय्कू लागाय् दुहां वःपिं पर्यटकतय् ल्याः अप्वया वःगु दु । तःभुखाचं उगु लागाया आपालं सांस्कृतिक, ऐतिहासिक, धार्मिक व पुरातात्विक महत्वया सम्पदा क्षति जुइवं पर्यटकत दुहां वयेगु म्हो जुयाच्वंगु खःसा लिपांगु इलय् हनुमानध्वाखा लाय्कू लागा अवलोकनया निंतिं दुहां वइपिं पर्यटकतय् ल्याः अप्वःगु खः ।

बसन्तपू व हनुमानध्वाखा लाय्कू लागाय् भुखाचं क्षतिग्रस्त आपालं सम्पदा लिपांगु इलय् पुनःनिर्माण जुयाच्वंगु अवस्थाय् बसन्तपू अवलोकनया निंतिं वइपिं पर्यटकत नं अप्वःगु खः । बसन्तपू–हनुमानध्वाखा लाय्कू लागाया अवलोकनया निंतिं वइपिं पर्यटकमध्ये सार्क राष्ट्रया पर्यटकयात प्रवेश शुल्क वापत सत्या तका कायेगु यानाच्वंगु दुसा सार्क राष्ट्र बाहेकं स्वंगू मुलुकं वइपिं पर्यटकयाके द्वःछितका कायेगु यानाच्वंगु दु ।

थ्व हे झ्वलय् बसन्तपू लाय्कू लागाया अवलोकनया निंतिं वंगु कात्तिक ५ गते आतकया हे दकलय् अप्वः सार्क राष्ट्रं ८२ म्ह व मेमेगु देशं २६९ पर्यटक दुहां वःगु खः । थुपिं पर्यटकपाखें छन्हुया दुने दकलय् अप्वः झिंस्वंगू लाख आम्दानी जूगु सीदुगु दु । थ्व ल्याः आतकया छन्हुया दुने बसन्तपू हनुमाध्वाखा अवलोकनया निंतिं वःपिं पर्यटकय् दकलय् अप्वः खः ।

मेमेगु दिनय् सामान्यतः छन्हुया दुने पर्यटक प्रवेश शुल्कपाखें न्हिं १० गू लाख तका तक आम्दानी जुइगु यानाच्वंगु दु । २०७२ साल बैशाख १२ गतेया विनाशकारी तःभुखाचं बसन्तपू व हनुमानध्वाखा लागाया झण्डै छगू दर्जन स्वयां अप्वः ऐतिहासिक, सांस्कृतिक व धार्मिक सम्पदा पूर्णरुपं क्षति जूगु खःसा गुलिं सम्पदा सामान्य क्षति जूगु खः ।

क्षतिग्रस्त सम्पदा मध्ये गुलिं सम्पदाया पुनःनिर्माण सिधःगु दुसा गुलिं पुनःनिर्माण शुरु जुइधुंकूगु व गुलिं शुरु यायेगु क्रमय् दु । बसन्तपू लागाया हे दकलय् महत्वपूर्ण सम्पदाया रुपय् दयाच्वंगु मरुसतः व नौतल्ले दरवार पुनःनिर्माण जुयाच्वंगु दुसा गद्दी बैठकया निर्माण सिधयेधुंकूगु दु । अथे हे गद्दी बैठक न्ह्यःने च्वंगु माजु देगःया पुनःनिर्माण नं वंगु सोमवाःनिसें शुरु जूगु दु ।