केन्द्रया समीकरण हिलेवं आः प्रदेशय् नं समीकरण हिलीगु
येँ (नेपालभाषा टाइम्स)÷केन्द्रय् सत्ता समीकरण हिलेवं उकिया लिच्वः आः प्रदेश सरकारय् नं लाइगु सम्भावना खने दया वःगु दु । संघया सत्ता समीकरण हिउगुया न्हापांगु प्रादेशिक लिच्वः कथं नेकपा (एमालें) सुदूरपश्चिम प्रदेश सरकारयात बियातःगु समर्थन लित कयाः सरकारं पिहां वःगु दु ।
नेकपा एमाले केन्द्रीय निर्देशन कथं प्रदेश संसदीय दलं नेकपा एकीकृत समाजवादीया मुख्यमन्त्री दीर्घबहादुर सोडारीयात बियातःगु समर्थन लित काःगु खः । नेकपा (एसं) पार्टीगत निर्णय हे यासें न्हूगु समीकरणयात ग्वाहालि मयायेगु धायेवं सुदूरपश्चिमय् नेकपा (एस) या सरकारयात बियातःगु समर्थन लित कायेगु निर्णय एमालें याःगु खः ।
उकथं हे बागमती प्रदेशय् माओवादीया सरकारयात बियातःगु समर्थन नं एमालें लित काइगु खँ धाःगु दु । बागमती प्रदेशय् नेकपा माओवादीया सालिकराम जम्कट्टेल मुख्यमन्त्री जुयाच्वंगु दु । बागमती प्रदेशय् जम्कट्टेलया सरकारयात बियातःगु समर्थन लित कयाः आः नेपाली कांग्रेसया नेतृत्वय् सरकार गठन याये फइगु खँ धाःगु दु । न्हय्गू प्रदेश मध्ये मधेस छगू त्वःताः आः स्वंगू एमाले व स्वंगू कांग्रेसं इना काइगु खँ धाःगु दु ।
LEAVE YOUR COMMENTS