किपूलि ५० शैयाया आइसोलेसन वार्ड

किपू नगरपालिकां ५० शैयाया आइसोलेन वार्ड निर्माणया ज्या शुरु याःगु दु । नगरपालिकां कोरोना भाइरसया सम्भावित संक्रमिततयत गुणस्तरीय रुपं वासः यायेगु निंतिं त्रिवि जनस्वास्थ्य केन्द्र विभागय् ५० बेडया आइसोलेसन वार्ड दयेकेगु ज्या याःगु खः । नगरपालिकां कोरोना भाइरस विरुद्धया अभियान अन्तर्गत अनया स्वास्थ्य शाखा, किपू अस्पताल व विष्णुदेवी अस्पतालनापया मंकाः योजनाय् थ्व ज्या न्ह्याकूगु खः ।

अथेहे नगरपालिकां किपू नगर दुने ज्यालादारी व मजदुरया ज्या यानाच्वपिनि विवरण बुझे यायेत नगरवासीतय्त इनाप याःगु दु । किपू नगर दुने सुयां छेँय् न्हिया न्हिथं ज्यालादारी व मजदुरी याइपिं च्वनाच्वंगु दुसा इमिगु विवरण सम्बन्धित वडाय् बीत इनाप याःगु दु । कोरोना भाइरसया कारणं ज्यालादारी मजदुरतय्त थाकुयाच्वंगुलि इमिगु विवरण संकलन यायेगु ज्या नगरपालिकां न्ह्याकूगु खः ।

(ने. सं. ११४० चौलाथ्व ३ / वि. सं २०७६ चैत १४, शुक्रवाः)