मिटर ब्याज पीडितयात वार्ताय् सःतल
येँ (नेपालभाषा टाइम्स)÷गृह मन्त्रालयं मिटरब्याज पीडिततलिसे वार्ताया नितिं आह्वान याःगु दु । मन्त्रालयं सहसचिव रुद्रप्रसाद पण्डितया संयोजकत्वय् न्याम्ह दुजः दुगु वार्ता पुचः हे नीस्वनाः मिटरब्याज व ठगी विरुद्ध किसान मजदुर संघर्ष समितियात वार्ताया नितिं आह्वान यागु खः । वंगु नीन्यान्हु न्ह्यः थीथी जिल्लां न्यासि वयाः मिटर ब्याज पीडितत येँय् थ्यंकः वःगु खः ।
मन्त्रालयं मिटर ब्याज पीडिततय्सं यानाच्वंगु पैदलयात्रा, प्रदर्शन लगायत आन्दोलनया ज्याझ्वः बारे जानकारी दुगु व ध्यानाकर्षण जूगु धासें वार्ताय् वयेत इनाप याःगु खः । मन्त्रालयं वार्ता आह्वान यासें च्वःगु पतिइ धयातःगु दु, ‘मिटर ब्याज सम्बन्धी समस्या ज्यंकेगु नितिं थुगु मन्त्रालयय् थीथी मितिइ सहलह जूगु दु ।
मिटर ब्याजलिसे सम्बन्धित समस्या ज्यंकेगु नितिं कानुन संशोधन, अधिकार सम्पन्न आयोग नीस्वनेगु, आयोगया कार्यकाल समाप्त जुयाः विघटन जुइधुंकाः उजुरी फछ्र्यौट सम्बन्धी कार्यविधि दयेकाः निगुलिं पक्षया दथुइ सहलह समेत याकेगु व सहमति मजूगु विषयय् कानुन कथं मुद्दा दर्ता यायेगु जिम्मेवारी नेपाल प्रहरीयात बीगु व प्रमुख जिल्ला अधिकारीं उगु मुद्दाया अनुगमन यायेगु व्यवस्था मिले यानागु दु ।’
थ्वहे झ्वलय् मिटर ब्याज तथा ठगी विरुद्ध किसान मजदुर संघर्ष समिति केन्द्रीय सचिवालयं सरकारं आह्वान याःगु वार्तायात लसकुस यासें याकनं हे वार्ता कमिटी दयेकाः सरकारलिसे वार्ता यायेगु खँ धाःगु दु ।
LEAVE YOUR COMMENTS