किपूनिसें नगरकोट तक भन्तेपिनि पैदल

येँ – नेपाः वयाच्वंपिं १२० म्ह थाई भन्तेपिंसं किपुलिंनिसें नगरकोट तक न्यासि वनाः याये माःगु धार्मिक ज्या सम्पन्न याःगु दु ।थाइल्याण्डं वयाः किपूया श्रीकीत्ति विहारय् च्वनाच्वंपिं भन्तेपिंसं वंगु शनिवाः किपुलिं पैदल यात्रा शुरु यानाः खरिपाटीइ बाय् च्वंगु खः । वयां कन्हय् कुन्हु हानं न्यासि वनाः नगरकोट थ्यंकूगु खः । वसपोलपिंसं ४० किलोमिटर ताःहाकःगु यात्रा पार यानाः नगरकोट थ्यंकाबिज्याःगु खः ।नगरकोटय् व लँय् बाय् च्वंथाय् वसपोलपिं जंगलय् वनाः ध्यान च्वं वंगु खः ।
थाइल्याण्डय् नं थ्व भन्तेपिं थथे हे न्यासि जक वनाः धर्म याइपिं खः । वसपोलपिंसं दँय् ६०० किलोमिटर न्यासि वने हे माः धइगु नियम दु । थ्व नं छगू कथंया ध्यान हे खः । थज्याःगु ध्यानयात ‘धुतङ’ धाइ । न्यासि वनाः जंगलया दुने दुने थ्यंक थ्यंकेगु व अन च्वनाः ध्यान यायेगु हे थुकिया मू ज्या खः । नेपालय् थ्व ज्याया ग्वसाः किपूया श्रीकीत्ति विहारं याःगु खः ।