ने. सं. ११४६ बछलागा सप्तमी -

जोकोभिकं युएस ओपन त्वःतल

डिफेन्डिङ्ग च्याम्पियन नोभाक जोकोभिकं युएस ओपनया कासा त्वःतूगु दु । स्वीस कासामि स्टन वावरिन्का लिसे प्रिक्वार्टफाइनलया कासा म्हिताच्वंगु इलय् जोकोभिकं दथुइ हे कासा त्वःतूगु खः । निगू सेटं लिउने लानाच्वंम्ह ३२ दँया जोकोभिकं ब्वह स्याना वःगुलिं कासा त्वःतूगु खः ।

सर्वियन कासामिं कासा त्वःतीगु जुइवं कोर्टय् थ्यनाच्वंपिं स्वकुमिपिंसं दनाः तसलं वयात बिदाइ याःगु खः । ‘जितः माफ यानादिसँ, छिकपिं सकलें पूवंक कासा स्वयेत थन वःगु खः, तर जिं म्हिते मफुत’ कासा त्वःता वनेगु झ्वलय् विश्व नं. १ कासामि जोकोभिकं धाःगु खः ।

प्यंगूगु चरणया थ्व कासाय् स्वंगू ग्रान्डस्लाम च्याम्पियन वावारिन्कां जोकोभिकयात दबाबय् तयातःगु खः । जोकोभिकं कासा त्वःतूगु इलय् वावारिन्कां ६–४, ७–५ व २–०या सेटं अग्रता कयाच्वंगु खः । ३४ दँया वावरिन्कां आः क्वार्टरफाइनलय् रसियन कासामि डानिल मेडभेडलिसे म्हिती ।