थनिंनिसें साफ च्याम्पियनसिप, माल्दिभ्स विरुद्ध नेपाःया न्हापांगु कासा

येँ-माल्दिभ्सय् शुक्रवाः निसें १३ औं साफ च्याम्पियनसिप शुरु जुइगु जूगु दु । असोज १५ गते निसें असोज ३० गते तक जुइगु साफ च्याम्पियनसिपय् थुगुसी न्यागू देसं जक ब्वति काःगु दु । साफ च्याम्पियनसिपय् साविक विजेता व ग्वसाः देय् माल्दिभ्स, नेपाल, भारत, बंगलादेश व श्रीलंकां ब्वति काःगु खः । भुटानं कोरोना महामारीया कारणं साफय् ब्वति मकाःगु खःसा पाकिस्तानयात फिफां प्रतिबन्ध तयातःगु दु ।

साफ च्याम्पियनसिपया न्हापांगु कासा साविक विजेता व ग्वसाः देय् माल्दिभ्स व नेपालया दथुइ जुइ । प्रशिक्षक अलमुताइरीं न्हापांगु कासा हे साविक विजेता व ग्वसाः देय्नाप जुइत्यंगुलिं कासा म्हितेत भचा थाकुइगु धाःगु दु । नेपालं निगूगु कासा असोज १८ य् श्रीलंकालिसे, असोज २४ य् भारतलिसे व असोज २७ य् बंगलादेशलिसे म्हिती । थुगुसी सिंगल राउण्ड रोविनया लिधंसाय् कासा जुइ । शीर्ष निगू टिमया दथुइ असोज ३० गते फाइनल कासा जुइ ।

नेपालं आःतक साफ च्याम्पियनसिपया उपाधि त्याकूगु मदुनि । अझ फाइनलय् तक नं थ्यंगु मदुनि । साफ च्याम्पियनसिपया तयारीया निंतिं थुगुसी नेपालं कतारय् वनाः प्रशिक्षण याःगु खः । कतारय् नेपालं ओमाननाप छगू मैत्रीपूर्ण कासा नं म्हितूगु खः । कासाय् नेपाल ७–२ गोलं बूगु खः । कतार वने न्ह्यः नेपालं भारतनाप निगू मैत्रीपूर्ण कासा म्हितूगु खः । न्हापांगु मैत्रीपूर्ण कासाय् नेपालं भारतनाप छगू छगूया बराबरी म्हितूगु खःसा निगूगु कासाय् २–१ गोलं पराजित जूगु खः ।