जैशीदेवल डोजाङया स्वक्वःगु मेयर कप क्वचाल

येँ (नेपालभाषा टाइम्स)- जैशिदेवल युथ क्लबया ग्वसालय् जूगु स्वक्वःगु जुनियर आमन्त्रण मेयर कप तेक्वान्दो कासा क्वचाल । क्लबया जैशिदेवल तेक्वान्दो डोजाङपाखें जूगु बागमति प्रदेशस्तरीय उगु कासा दशरथ रंगशालय् माघ १२, १३ व १४ गते स्वन्हुयंकं जूगु खः ।

क्लबया नायः, डोजाङ प्रमुखलिसें अन्तर्राष्ट्रिय रेफ्रि राजेश प्रजापतिया सभापतित्वय् जूगु ज्याझ्वलय् मूपाहांकथं येँ महानगरपालिकाया प्रवक्ता नापं येँमपा १७ वडाया अध्यक्ष नविन मानन्धर झायदीगु खःसा विशेष पाहांकथं येँमपा २१ वडाअध्यक्ष उदयचुडामणि वज्राचार्य, १२ वडाअध्यक्ष बालकृष्ण महर्जन, १४ वडाअध्यक्ष सुमन श्रेष्ठ, नेपाल ओलम्पिक कमिटीया उपाध्यक्ष सुनिल श्रेष्ठ, तेक्वान्दो संघ बागमती प्रदेश अध्यक्ष केशव पुरी व त्रिभुवन विश्वविद्यालय प्राध्यापक संघया अध्यक्ष सागरदास रंजितपिं झायादीगु खः ।

येँ महानगर, नार्गाजुन, पन्ति, निलकण्ठ सूर्यविनयाक, रत्ननगर, गोदावरी, तारकेश्वर, महालक्ष्मी, ख्वप, चद्रागिरि, बा¥हविसे बुढानिलकण्ठ तोखा व मध्यपुरथिमि नगरपालिका यानाः झिंन्यागू स्थानीय निकायया मुक्कं ४०० म्ह कासामिं ब्वति काःगु कासाय् येँ महानगरपालिका च्यागू स्वर्ण निगू रजत व छगू कास्य त्याकाः न्हाप, जैशीदेवल तेक्वान्दो स्वंगू स्वर्ण, छगू रजत व स्वंगू कास्य त्याकाः लिउ व ख्वप नगरपालिका निगू स्वर्ण व प्यंगू कास्य त्याकाः लियांलिउ लाकेत ताःलाःगु दु । कासाय् त्याःपिं कासामिपिंत मूपाहां मानन्धरं ट्रफी, दसिपौ व मेडल लःल्हानादीगु खः ।

कासाय् विशेष ग्वाहालि यानादीपिं अमेरिकाय् च्वँच्वना दीम्ह शुद्धोदनमान रंजित, रिता श्रेष्ठ, राजेश रंजित, राकेश रंजित, विनोद श्रेष्ठ, नविन शाक्यलिसें येँ महानगरपालिका, नार्गाजुन नगरपालिका, चन्द्रगिरि नगरपालिका, , प्याराडाइज पार्टी प्यालेस, सुप्रवाह प्रकाशन, प्रि–फिक्स नेपालयात नं सम्मान पत्र लःल्हाःगु ।