
येँ (नेपालभाषा टाइम्स)- नेपालं आइसिसी विश्वकप लिग २ अन्तर्गत किपुलिइ आइतवाः जूगु कासाय् युएईविरुद्ध कीर्तिमान विजय चूलाकुसें ओडिआई (एकदिवसीय अन्तराष्ट्रिय) मान्यता सुरक्षित याःगु दु । थ्व विजय लिसें लिग २ लय् शीर्ष न्यागू देय् दुने लाःगु नेपाःयात आः वइगु प्यदँया निंतिं अन्तर्राष्ट्रिय मान्यता चूलाइ । किपुली जुयाच्वंगु मेगु निगू कासा नं त्याकेफत धाःसा नेपालं विश्वकप छनोट कासा नं म्हितेखनी ।
नेपालं युएईयात १७७ रनं बुकुसें कीर्तिमानी विजय चूलाकूगु खः । थ्व नेपालं आःतक रनया ल्याखं चूलाकूगु विजयय् दकलय् अप्वः रनं त्याकूगु खः । थ्वयां न्ह्यः सन् २०२१ य् पपुवा न्यूगिनीयात १५१ रनं त्याकूगु कीर्तिमान जुयाच्वंगु खः । थ्व विजय चूलाकेगु निंतिं नेपालं युएईयात २२.५ ओभरय् ७१ रनय् अलआउट याःगु खः । न्हापां ब्याटिङ याःगु नेपालं युएईयात २४९ रनया लक्ष्य बिउगु खः ।
कीर्तिमानी विजय चूलाकेगु झ्वलय् नेपाःया निंतिं ललितनारायण राजवंशीं घाटक बलिङ याःगु खः । राजवंशीं ७.५ ओभर बलिङ यासें २१ मेडन सहित २० रन खर्च यानाः न्यागू विकेट काःगु खः । राजवंशीया थ्व थःगु करियरया हे दकलय् उत्कृष्ट प्रदर्शन खः । कासाय् सन्दीप लामिछानें निगू, सोमपाल कामी, गुलशन झा व दीपेन्द्र सिंह ऐरीं छगू छगू विकेट काःगु खः ।
न्हापां ब्याटिङ याःगु नेपाल ४९.२ ओभरय् २ सय ४८ रन दयेकाः अल आउट जूगु खः । नेपाःया निंतिं कप्तान रोहित पौडेलं दकलय् अप्वः ७७ रन दयेकूगु खः । पौडेलं ११२ बलय् गुंगू चौका थ्वाःगु खः । थ्व झ्वलय् पौडेलं एकदिवसीय क्रिकेटय् थःगु च्यागूगु अर्धसतक पूवंकुगु खः । पौडेल एकदिवसीय क्रिकेटय् नेपाःपाखें दकलय् अप्वः अर्धसतक थ्वाःम्ह कासामि नं जूगु दु । पौडेलं प्यंगूगु विकेटया निंतिं भीम सार्कीलिसे ५४ रन व न्यागूगु विकेटया निंतिं आरिफ शेखलिसे ८६ रनया साझेदारी याःगु खः ।
नेपाःया निंतिं आरिफ शेखं ४३, गुलशन झां ३७, दीपेन्द्र एरीं ३४, भीम सार्कीं २९, कुशल भुर्तेलं ८, कुशल मल्लं ९, सन्दीप व सोमपालं २–२ रनया योगदान बिउगु खः । ओपनर आसिफ शेख धाःसा निगूगु ओभरय् शून्यय् आउट जूगु खः ।
LEAVE YOUR COMMENTS