पुलांम्ह मेयरयात यौन द्वपं बारे येँ मनपाया धापू

येँ – येँ मनपाया पुलांम्ह मेयर लिसें ३ नम्बर प्रदेशया मुख्यमन्त्री केशव स्थापित विरुद्ध लाःगु यौन दुराचार सम्बन्धी मुद्दाय् येँ मनपां थःगु धापू स्पष्ट याःगु दु । येँ मनपाया पुलांम्ह कर्मचारी मय्जु रश्मिला प्रजापतिं तत्कालिन मेयर स्थापितं थःत तःगु यौन प्रस्ताव अस्वीकार यानागु कारणं थःत जागिरं लिकाःगु द्वपं बियादीवं थ्व मुद्दा चर्चाय् वःगु खः ।

म्हिगः येँ मनपाया प्रवक्ता ज्ञानेन्द्र कार्कीं छगू वक्तव्य जारी यासें मय्जु प्रजापतियात ज्यां लिकायेगु ज्याय् स्थापितया छुं ल्हाः मदुगु खँ धाःगु दु ।

प्रजापतिं याःगु अनियमित ज्याया विरोधय् कर्मचारीतय्सं हडताल याःगु कारणं वय्कःयात तत्कालिन हनुमानढोका दरवार क्षेत्र संरक्षण कार्यक्रमया प्रमुख पदं चीकूगु व लिपा छगू समिति हे दयेकाः छानबिन यासें अस्थायी जागिरं चीकूगु खँ नं वक्तव्यय् स्पष्ट यानातःगु दु । लिसें प्रजापतियात जागिरं लिकाःगु इलय् स्थापित मनपाया मेयर मखयेधुंकूगु खँ नं वक्तव्यय् धयातःगु दु ।