पब्जीया ल्वापुं हत्या लिपा आत्महत्या !

येँ – थनया बौद्धस्थित राधाकृष्ण देगः लिकसं सिनाच्वंपिं छम्ह ल्याय्म्ह व छम्ह ल्यासेया मृत्युया कारण पब्जी गेम जुइ फइगु अनुमान याःगु दु । सीपिं अनिश जिमी व युसुना राई खः । प्रहरीया कथं उपिं निम्हं छगू हे क्वथाय् च्वनीपिं खः ।

महानगरीय प्रहरी परिसर टेकुया अनुसन्धान अधिकृतया कथं सीपिं निम्हं थवंथवय् म्हसिउगु नं आपाः मदुनि । नीस्वन्हु न्ह्यः मोबाइल गेम पब्जी म्हितेगु झ्वलय् उमि म्हसीका कालबिल जूगु खः, लिपा गेमय् खँ ल्हायेगु झ्वलय् निम्हेसिया दथुइ मतिना जूगु खनेदुसा मतिना जूगु छुं न्हि लिपा हे उपिं नापं च्वनेगु शुरु जूगु खः ।

प्रहरीं उगु छेँय् च्वनीपिं मेपिं मनूतय्के न्यनेकने यायेगु झ्वलय् उपिं क्वथां हे पिहां मवइगु खँ सीदुगु दु । छेँय् च्वनीपिंसं बिउगु जानकारी कथं उपिं चछि गेम म्हिताः हल्ला यानाच्वनीगु खः । बिहीवाः चान्हय् उपिं बजि व ला नयाच्वंगु खः, आकाझाकां चान्हय् १ बजेपाखे ल्वापु जूगु तायाः द्यने धुंकूपिं मनूत उमिगु क्वथाय् वंगु खः । क्वथा दुनें चुकू तयातःगुलिं तछ्यानाः दुहां वनेगु कुतः यायेगु लिसें प्रहरीयात नं जानकारी बिउगु खः ।

निम्हं गम्भीर घाःपाः जुयाच्वंगु खँ सीवं महानगरीय अपराध अनुसन्धान महाशाखाया प्रमुख एसएसपी चन्द्रकुवेर खापुङ व महानगरीय प्रहरी परिसर टेकुया प्रमुख एसएसपी सुदिपराज गिरीया पुचः नं घटनास्थलय् थ्यंगु खः । प्रहरीं हत्या लिपा आत्महत्या याःगु आशंका याःगु दु । मिजनं न्हापा मिसायात स्यानाः लिपा थम्हं आत्महत्या याःगु अनुमान याःगु खः ।

प्रहरी थ्यंगु इलय् तक मिजंम्हेसिया सासः चले जुयाच्वंगु खःसा लिपा अस्पताल थ्यंबलय् डाक्टरतय्सं मृत्यु जुइधुंकूगु खँ धाःगु खः ।

सम्बन्धित बुखँ

LEAVE YOUR COMMENTS