ने. सं. ११४४ कौलाथ्व पारू - नःलास्वनेगु

झी प्रतिक्षाय्

बालेन हाइ हाइ, काठमाडौंया सर्गतय् थ्वइ । काठमाडौं महानगरपालिकाया युवा नेता बालेनं अनैतिक संरचनात डोजर छ्यलाः थुनी । पेटी पेटी दुगु पसःतय्त चिइकाछ्वइ । बालेनया थ्व साहसी कदमयात कयाः अधिकांश काठमाडौंवासीतय्सं प्रशंसा याइ । वया अठोट व ढृढतां यक्वसित प्रभावित याइ । खतुं खुल्ला पेटीइ पसः तयाजूपिंसं बालेनया विरोध याइ । बालेनं गरिब, दुःखि जनताया रोजगारीयात लाकाकाल, चांन्हिं मेहनत यानाः नये त्वनेगु चुलाकाच्वंपिं सामान्य व्यापारीजनतय् नयेगु भु हे लाकाबिल, लजगाविहिन यानाबि, छु नयेगु? मचाखाचायात गय« लहीगु, तःधंगु संकटय् लाका बिल धयागु द्वपं बियाः येँया मेयरयात पेटीया प्रभावित व्यापारीतसें आरोप बी । आक्रामक शैलीं ब्वबी ।

अथेहे पास जूगु नक्सा विपरीत अनियमित ढंगं, गैरकानुनी ढंगं दयेकातःगु संरचनाय् नं मेयर बालेनं युद्धस्तरीय ढंगं डोजर छ्यलाः मारमुर यानाबिल । क्वःथलाबिल । अधिकांश जनतां बालेनया थ्व ज्यायात स्वागत यात । बालेनं थःगु साहसी ज्याया कारणं रातारात हिरो जुल । देशया भताभुंग हालत खनाः वाक्क दिक्क जूपिं जनतां ला देशयात नं बालेन थेंज्याःपिं युवा नेतात माल धयाहल । आः देशय् याकनं वयाच्वंगु आम चुनावं देशय् जागरुक युवावर्गतय्त हयेमाल, देशया राजनैतिक नेतृत्वय् युगान्तकारी परिवर्तन हयेमाल, जनताय् जागरण लुया वयाच्वंगु खनेदइ ।
बालेनं पेटीं चीकूपिं ब्यापारीतसें धाइ, बालेनं थःपिंप्रति जघन्य अपराध या त। थः मस्तय्त प्वाथय् ल्वहंतं छ्यात । थज्याःगु आरोप बियाः थुकिया परिणाम बांलाइमखु धकाः ख्याच्वः बिल ।

खः, देशय् सम्पूर्ण जनतां आर्जन यायेगु अवसर प्राप्त याये दयेमाः । इमि म्वायेगु अवसर सुनिश्चित जुइमाः । प्रत्येक जनतां राज्यपाखें आर्थिक रोजगारीया निंतिं सरकारयात दबाब बी दइ । माःसा संघर्ष नं याये फु । ज्या यायेगु अधिकार बिउ, जिमि मचाखाचातय्त नसा चूलाकेमाः धयागु माग सम्ब्न्धित सरोकारवालातय् न्ह्यःने तये ज्यू । तयेमाः । सरकारं नं जनताया थज्याःगु जायज मागप्रति संवेदनशील जुइमाः। जनता प्रतिया थःगु जिम्मेवारीपाखें बिसिउँ वनेदइमखु । पलायनं समस्याया हल जुइमखु, बरु समस्यायात चर्को याइ, बिद्रोह हइ ।

तर हाल पेटी ब्यापारीतय् असन्तोष व बालेनया ‘सुगम पेटी’ आन्दोलन विपरीत हल्ला जायज खनेमदु । पेटी व्यापारीतय्त म्वायेगु अवसरया व्यवस्थापन जुइमाः धयागु आवाज लिसे सुयां बिमती दइमखु, समर्थन दइ, तर पेटी धयागु जनता जुइगु लँपु खः । पेटी नं जनताया प्रतीक खः । पेटीया कदर यायेगु, इज्जत तयेगु नं जनताप्रति मर्यादित जुइगु खः । उकिं पेटीइ व्यापार यानाः पेटीया मर्यादायात बेवास्ता यायेगु जनता विरोधी ज्या जुइ । थ्वयात प्रोत्साहित यायेमजिउ, धाय्बलय् पेटी व्यापारीतसें थःगु अधिकार हनन जूगु तायेके मज्यू ।

अथेहे नक्सा पास छगू कथं यायेगु, व्यवहारय् नक्सा विपरीत संरचना तनाः कुष्ट कमे यायेगु ज्या नं येँ महानगरपालिकाय् जुयाच्वंगु दु। पिने औपचारिक कथं नक्सा पास यानाः दुनें दुनें नियम विपरीत दयेकातःगु संरचनायात मेयर बालेनं डोजर लगे यानाः स्यंकाबिल । नक्सा अःखः थः यत्थें तनातःगु संरचनायात डोजरं चकनाचुर यानाबिल । बालेनं छिउगु पलाःपाखें प्रभावित महानुभावपिंसं डोजर आतंक धकाः विरोध प्वंकल । तर नक्सा कथं थःगु छेँ दयेकाच्वंपिंसं धाःसा बोलनया डोजरयात न्यायोचित खंकल । डोजरयात कयाः जय गान थ्वयेकल ।

आम जनतां सः थ्वयेकाहल, देशया हर क्षेत्रय् थौं मनोमानी राज व्याप्त जुयाच्वन । कार्यपालिका, व्यवस्थापिका, न्यायपालिका थज्याःगु देशया मू संस्थात थौं पेटीया ब्यापारीत थें जुल । गंजागोल, अराजक, अनियन्त्रित छाडा, नक्सा विहीन कुरुप संरचना थें । थन नं थौं बोलनया डोजर थेरापी –उपचार) आम जनतां आशा याइ । देशया झारपात ं जाःगु अष्टावक्र थज्याःगु राज्यया भताभुङ संस्थाय् नं डोजर चले यायेमाल, डोजर चले यायेमाः । ताकि देशया राज्य व्यवस्था सुगम जुइ । ताकि देशया नक्सा स्पष्ट जुइ । तोडमोडविहीन जुइ । तर व डोजरया महानायक सु जुइ ? झी प्रतीक्षाय् ।