ने. सं. ११४४ ञलाथ्व दशमी -

अमेरिकी प्रभाव तयेगु दाउ !

येँ – नेपाल कम्युनिष्ट पार्टीया थन न्ह्यानाच्वंगु सचिवालय बैठक अमेरिकां बीत्यंगु छगू ग्वाहालि कायेगु लाकि मकायेगु धइगु खँय् वनाः थाः वंगु दु । ‘मिलिनियम च्यालेन्ज कर्पोरेशन (एमसीसी)’ नां तयाः नेपाःया पूर्वाधार विकासया लागिं बीत्यंगु करिब ६० अर्ब तका दां काये जिउ लाकि मजि धइगु खँय् थ्व विवाद जूगु खः ।
अमेरिकां थ्व ग्वाहालि नेपालय् विस्तार यायेत्यंगु इण्डो–प्यासिफिक सामरिक रणनीति अन्तर्गत बीत्यंगु खः धइगु खँ चर्चाय् वयेवं नेकपा दुने थुकियात कयाः विवाद शुरु जूगु दु । यदि थ्व दां इण्डोप्यासिफिकया हे छगू अंग खत धाःसा उकियात स्वीकार याये मजिउ धइगु सः नेकपा दुने थ्वयाच्वंगु दु । थन न्ह्यानाच्वंगु सचिवालय बैठकय् म्हिगः पार्टीया नेतातय्सं थुकियात कयाः बिउगु लिसः चित्त बुझे मजुयाः बैठक हे ताःहाकः जू वंगु खः । आः सत्तारुढ दल नेकपां अमेरिकाया हे थुकियात कयाः न्यनेकने यायेगु धकाः नं निर्णय याःगु दु ।

पुस ४ गतेनिसें शुरु जूगु संसदया चिकुलाया अधिवेशनय् अनुदान सम्बन्धी थ्व सम्झौता पेश यानाः पारित यायेमाःगु दु । संसदं पारित जूसा जक नेपालं थ्व अनुदान काये फइ । नेपालं थ्व अनुदान सम्झौताय् हस्ताक्षर याःगु धाःसा यक्व न्ह्यः हे खः । देशय् कांग्रेसया सरकार दुगु इलय् अमेरिकाया वाशिंगटनय् कांग्रेसयाम्ह हे मन्त्रीं थुकी हस्ताक्षर याःगु खः । आः नं थ्व सम्झौतायात सरकारं याकनं पारित यायेमाः धकाः कांग्रेस नेतातय्सं माग यानाच्वंगु दु । पुलांम्ह अर्थमन्त्री डा. रामशरण महतं सामाजिक सञ्जाल मार्फत हे थ्व सम्झौता पारित यायेत आह्वान यानादीगु दु । विपक्षीं समर्थन याःसां सत्तारुढ दल दुनेया विवादं धाःसा न्ह्याः वनाच्वंगु मदुनि ।

एमसीसीया विरोध छाय् ?

सरकारं तःदँ न्ह्यः हे हस्ताक्षर यायेधुंकूगु खःसां मिलिनियम च्यालेन्स कर्पोरेशन (एमसीसी) यात कयाः विवाद पिहां वःगुया कारण थुकी उल्लेख जुयाच्वंगु छता निता बुँदा खः धाःगु दु । थ्व सम्झौता कथं नेपाःयात वइगु ध्यबा विशेष यानाः पूर्वाधार निर्माणय् खर्च यायेमाः धइगु शर्त दु । तर अज्याःगु पूर्वाधार निर्माणय् नेपालं दयेकीगु योजनाय् धाःसा भारतया नं स्वीकृति कायेमाः धइगु बुँदा नं उकी दुथ्याकातःगु दु । थुकिं यानाः नेपालं अमेरिकाया ध्यबा कायेत नं भारतया स्वीकृति कायेमाःगु अवस्था हया बिउगु दु । अथे हे छुं जुयाः थ्व सम्झौता व नेपाःया छुं कानून थवंथवय् ल्वात धाःसा नेपाः सरकारं थःगु देशया कानून मखु कि थ्व सम्झौतायात मान्यता बीमाः धइगु बुँदा नं उकी तयातःगु दु । थुकिं यानाः थ्व सम्झौता नेपाःया सार्वभौमसत्तायात तकं मल्वः धइगु सः पिहां वयाच्वंगु खः ।