घोषणापत्रय् मातृभाषा ग्व ?

येँ- न्ह्यःने वयाच्वंगु स्थानीय चुनावय् मातृभाषां शिक्षा बी धयागु खँयात राजनीतिक दलतय्सं वेवास्ता याःगुलिं भाषा आयोगं विरोध याःगु दु ।

आयोगया अध्यक्ष डा. लवदेव अवस्थीं संविधानं बिउगु भाषा व शिक्षा सम्बन्धी अधिकारयात राजनीतिक पार्टीतय्सं ल्वःमंकूगु धासें उकियात कयाः विरोध प्वंकादीगु खः ।

वय्कलं स्थानीय निकायया निर्वाचनया झ्वलय् उम्मेदवारी बिउपिं जनप्रतिनिधितय्सं स्थानीय तहया शिक्षा गुणस्तरीय यायेगु नामय् ‘अग्रेजी माध्यमं’ ब्वंकेगु धकाः न्ह्यथनातःगु हे गलत जूगु खँ नं धयादीगु दु ।

वय्कलं संविधानय् नेपालय् ल्हाइगु फुक्कं भाषा राष्ट्रभाषा खः धकाः न्ह्यथनातःगु धासें हरेक नेपाःमिं कानुन कथं थःथःगु मांभासं शिक्षा कायेदइगु हक उल्लेख जुयाच्वंगु खँ कनादिल । वय्कलं धयादिल, ‘जनप्रतिनिधितय्सं थःगु पालिका दुने गुणस्तरीय शिक्षा बीगु धासें अग्रेजी माध्यम नालेगु धकाः प्रलोभन क्यनाच्वंगु दु, थ्व दंगु लोक प्रिय नारा जक खः । माध्यमिक तह तक विद्यालय सञ्चालन यायेगु जिम्मेवारी स्थानीय निकायया खः, अथे जुयाः जनप्रतिनिधितय्के स्थानीय जनताया संवैधानिक हक हनन यायेगु अधिकार मदु ।’

उकथं हे वय्कलं भाषा आयोगं वंगु भदौ महिनाय् झिंछगू भाषायात प्रदेशया सरकारी ज्याखँया भाषाया रुपय् कार्यान्वयन यायेत सिफारिस यानागु धासें देय्या फुक्कं भाषाया अस्तित्व संकटय् लानाच्वंगु थौंया अवस्थाय् सरकारी ज्याखँया भाषा क्वःछीमाःगु खँय् नं बः बियादीगु दु ।
अध्यक्ष अवस्थीं स्थानीय सरकारं वडाय् ल्हाइगु भाषा मध्ये बाहुल्यताया आधारय् ज्याखँया भाषा दयेकेमाःगु सुझाव बिसें धयादिल, ‘भोट कायेगु नामय् न्हापांनिसें न्ह्यानाच्वंगु गलत चिन्तन व अग्रेजी मोह त्याग यासें स्थानीय भाषायात संरक्षण यायेत जनप्रतिनिधिपिं प्रतिबद्ध जुइमाःगु खः, तर अथे जुयाच्वंगु मदु ।’

फुक्क धइथें राजनीतिक पार्टीतय्सं सामुदायिक विद्यालययात प्राथमिकता बियाः घोषणा पत्र जारी याःगु खःसां नं मातृभाषाया बारे मौन जुयाच्वंगु धासें आयोगं राजनीतिक पार्टीया ध्यानाकर्षण याइगु जूगु दु ।

स्थानीय भासं घोषणापत्र
स्थानीय चुनावय् आः तक पिहां वःगु घोषणापत्रत मध्ये एमाले, जसपा, स्वतन्त्र उम्मेदवार सुमन साय्मिया घोषणापत्रय् जक स्थानीय विषय स्थानीय भाषां ब्वंकेगु व्यवस्था याये धकाः च्वयातःगु खनेदु । मेमेगु पार्टीया घोषणापत्र धाःसा थुकी मौन दु । अथे हे एमालेया उपत्यका कमिटीं थःपिनिगु प्रतिवद्धता पत्र नेपालभाषा, खस नेपाली व अंग्रेजीं सार्वजनिक याःगु दु । नेपाली कांग्रेसं येँया उम्मेदवार सिर्जना सिंहया ‘सात संकल्प’ नेपालभाषां पिथंगु दु । थः त्यात धाःसा नेवाः भाय् व नेवाः संस्कृतिया रक्षा याये धाःपिं उम्मेदवारतय्सं नं सामाजिक सञ्जालय् धाःसा खस नेपाली भासं जक थःपिनिगु प्रचार यानाच्वंगु खनेदु ।

सम्बन्धित बुखँ

LEAVE YOUR COMMENTS