थाय्थासय् धाँधलीया द्वपं बिसें पुनः मतदानया माग

येँ (नेपालभाषा टाइम्स)- गोरखाय् सत्ता गठबन्धनं धाँधली याःगु द्वपं बिसें नेकपा एमाले, राष्ट्रिय स्वतन्त्र पार्टीया उम्मेदवारतय्सं हाकनं मतदान यायेत माग याःगु दु । म्हिगः पत्रकार सम्मेलन यानाः उमिसं गोरखाया १२ गू मतदान केन्द्रय् हाकनं मतदान यायेत माग याःगु खः ।

गोरखाया निगुलिं निर्वाचन क्षेत्रया मतदान केन्द्रय् सीधुंकूपिं, बेपत्ता जूपिं, विदेशय् वनाच्वंपिं व अनुपस्थित मतादाताया नामं समेत मतदान याःगु धासें अन हाकनं मतदानया माग याःगु खः । अन छम्ह हे मनुखं झिक्वः तक मतदान याःगु द्वपं नं बिउगु दु ।

गोरखा–१ अन्तर्गत भिमेसन थापा गाउँपालिका वडा १ या बालकल्याण आधारभूत विद्यालय, वडा ८ या भिमसेन आधारभूत विद्यालय, वडा १ या विन्द्रवती मावि व धार्चे–३ या पार्वती आधारभूत विद्यालयय् हाकनं मतदान यायेमाःगु माग उमिसं याःगु दु । उकथं हे क्षेत्र नं. २ अन्तर्गत बारपाक सुलिकोट गाउँपालिकाया सूर्यज्योती मावि, वडा ४ या हिमालय मावि, पालुङटार नगरपालिका–७ या जीवनज्योती मावि, अजिरकोट गाउँपालिका–३या ज्ञानज्योती मावि, पालुङटार–१ या स्थानिका आधारभूत विद्यालय व सिरानेचा–८ या परोपकार माविइ नं हाकनं मतदान यायेमाःगु माग याःगु खः ।

अथे हे स्याङ्जाय् नं धाँधली जूगु धासें हाकनं मतदान याकेत थीथी पार्टीं माग याःगु दु । नेकपा एमालेया उम्मेदवार पद्मा अर्यालया नेतृत्वय् राष्ट्रिय स्वतन्त्र पार्टी, राष्ट्रिय प्रजातन्त्र पार्टीया उम्मेवारतय्सं स्याङ्जा–२ स हाकनं मतदान याकेत माग याःगु खः । उगु क्षेत्रय् नेपाली कांग्रेसं बुथ कब्जा याःगु द्वपं उमिसं बिउगु दु ।

उकथं हे थःगु पार्टीया मतदान प्रतिनिधियात धम्की बियाः अनधिकृत व्यक्तिया संलग्नताय् फर्जी मत तःगु द्वपं बिसें एमालें रुकुम पश्चिम जिल्लाया न्हय्गू मतदान केन्द्रय् नं हाकनं मतदान याकेत माग याःगु दु । एमालें बाँफिकोट ६ व ७, आठविसकोट २ व ३, सानी भेरी २ व ३ लिसे मुसिकोट १३ य् हाकनं मतदानया माग याःगु खः ।

प्रतिनिधिसभाया उम्मेदवार लिसें एमाले रुकुम पश्चिमया अध्यक्ष नन्दराम देवकोटां मतगणनाय् ब्वति मकायेगु खँ धाःगु दु । मेखे निर्वाचन कार्यालयं धाःसा झिगू मतदान केन्द्रया मतपेटिका वयेवं सर्वदलीय सहमति यानाः मतगणना न्ह्याकेगु खँ धाःगु दु ।