
येँ – भारतया नांजाःगु एनआरबी फाउण्डेसन व भब्या इन्टरनेशनलं नेपाःया वरिष्ठ कलाकार सुदर्शन राजोपाध्याययात सम्मान याइगु जूगु दु । स्वंगू दशक न्ह्यवंनिसें संगीत साधनाय् थःत पाना वयाच्वनादीम्ह वरिष्ठ सरोदवादकलिसें म्येँ हालामि राजोपाध्याययात ‘इन्डियन वेस्टिज अवार्ड–२०१९’ पाखें सम्मान यायेत्यंगु खः ।
थ्व हे वइगु असार २९ गते भारतया राजस्थानय् जुइगु ज्याझ्वलय् वय्कःया सम्मान याइगु ज्याझ्वः दु । भारतीय संस्थां दँय्दसं बीगु याना वयाच्वंगु उगु सम्मान थुगुसी संगीत व साहित्यपाखे राजोपाध्याययात बीत्यंगु खः । ज्याझ्वलय् नेपाःलिसें भारत, मालदिभ्स लगायतया देशं नं ब्वति काइ ।
अन्तर्राष्ट्रिय मैत्री सम्मेलनया झ्वलय् लाकाः जूवनाच्वंगु ज्याझ्वलय् कलाकार राजोपाध्यायं सरोदवादन नं न्ह्याब्वयादीत्यंगु दु । सन् २०१३ य् भारतया हे पश्चिम बंगाल सरकारपाखें नं सम्मानित जुयादीधुंकूम्ह वरिष्ठ सरोदवादक राजोपाध्याय सन् २०१५ य् गुजरातय् जूगु सुरिल साँझय् स्वर्णपत्र नं प्राप्त यानादीधुंकूगु दु । कलाकार राजोपाध्यायं सन् २००२ लय् रेडियो नेपालया ग्वसालय् जूगु जिल्लाव्यापी संगीत कासाय् न्हाप सिरपाः त्याकादीगु खः ।
LEAVE YOUR COMMENTS