येँ – नेपाःया हिमालपारी च्वंगु देय् धकाः म्हसिउगु मुस्ताङ थ्यंपिं आन्तरिक पर्यटकया ल्याः थुगुसी छन्हुं प्यद्वः थ्यनेवं अनया होटल व्यवसायीत आछु आछु कंगु दु । थुगुसी मोहनिया विदाय् लाकाः मुस्ताङ जोमसोमया मुक्तिनाथ समेत चाःहिलेगु ताः तयाः वनीपिं आन्तरिक पर्यटकया ल्याः छक्वलं अप्वःगु खः । थ्व झ्वलय् अन वंगु वालय् छन्हुं प्यद्वःम्ह आन्तरिक पर्यटक थ्यंगु खः । छक्वलं थुलि मनूतय्त व्यवस्थापन याये मफयाः अनया होटल व्यवसायीत वाथावाथा हे कंगु खः ।
थौंकन्हय् अन १५–१६ गू ति तक होटल दु । उकी नं विदेशी पर्यटकत च्वना च्वन धाःसा नेपाःमितय्त क्वथा मबीगु हे कुतः याइ । थप होटल चायेकेगु थाय् नं मदुगु जुयाः आः सरकारं धर्मशाला हे थपे यानाः आन्तरिक पर्यटकत च्वनेगु व्यवस्था याये मालीगु खँ अनया गाउँपालिका पदाधिकारीतय्सं धाःगु दु ।
अन चाःहिउ वइपिं अप्वः धइथें आन्तरिक पर्यटकतय्सं नयेगु नसा त्वँसा थः हे ज्वनावः थें आः मोहनि थेंज्याःगु इलय् वये माल धाःसा टेन्ट तकं थःपिंसं हे ज्वना वःसा अःपुइगु खँ नं धाःगु दु ।
मुस्ताङय् थथे आन्तरिक पर्यटक अप्वःगु थगुनेनिसें तिनि खः । लँ बांलाःगु व निजी गाडी नं वने जीवं अन वनीपिं नेपाःमित अप्वःगु खः ।
LEAVE YOUR COMMENTS