आदिवासी मदु धाःगु विरुद्ध तःजिगु प्रदर्शन

येँ– उपत्यका सडक विकास प्राधिकरणया आयुक्त भाइकाजी तिवारीं नेपालय् आदिवासी हे मदु धकाः छगू टेलिभिजनय् न्ववाःगु विरुद्ध शुक्रवाः छगू तःजिगु प्रदर्शन जूगु दु । असनं सुरु जूगु प्रदर्शन सलंसः मनूतय् सहभागीता दुगु खः । प्रदर्शनकारीतय्सं तिवारीया पुतला नं च्याकूगु खः ।

असनं सुरु जूगु शान्तिपूर्ण जुलुसय् स्वनिगःया सतक विस्तारं पीडितपिं लिसें सांसद राजेन्द्र श्रेष्ठ, लाहुर्नेपया महासचिव अधिवक्ता शंकर लिम्बु लिसें यक्व हे नेवाः कार्यकर्तातय् सहभागीता दुगु खः । असनय् प्रदेश नं. ३या सांसद राजेश शाक्यलिसें नरेशवीर शाक्यपिंसं न्ववासें जुलुस न्ह्याकूगु खः । असनं, झोछेँ, लगं, ह्यमत, भिंद्यःत्वाः जुयाः न्ह्याःवंगु जुलसं मरुय् थ्यंकाः तिवारीया पुतला च्याकूगु खः । पुतला च्याकेधुंकाः न्ह्याःवंगु जुलुस न्यत, त्यंगः जुयाः थायमदुइ वयाः क्वचायेकूगु खः । थाय्मदुइ क्वचायेके न्ह्यः मशाल च्याकाः प्रदर्शन याःगु खः ।

जुलसय् सहभागीपिंसं गैरन्यायिक सतक विस्तार बन्द याः, भाइकाजी तिवारी सीमा–झ्वकनिमाः, आदिवासी जनजाति एक जुइ धयागु नारा थ्वयेकूगु खः । शुक्रवाःया प्रदर्शनया झ्वलय् नं प्रशासनं तःम्ह हे दंगा प्रहरी खटे यानातःगु खः । तर थ्व प्रदर्शन धाःसा शान्तपूर्वक क्वचाःगु खः ।