मनपां होर्डिङ बोर्ड चिइकीगु

येँ – येँ महानगरपालिकां लिपांगु इलय् स्वनिगःया सहरी सुन्दरता हे कुरुप जुइकथं तयातःगु होर्डिङ बोर्ड चिइकेगुलिइ सक्रियता क्यना हःगु दु । महानगरपालिकां नियम अःखः सहरयात हे कुरुप जुइकथं तयातःगु अज्याःगु होर्डिङ बोर्ड चिइकेगुलिं चिउताः क्यंगु खः ।

येँ मनपां विज्ञापन होर्डिङ बोर्ड, अंगलय् व्यावसायिक कम्पनीया उत्पादन सम्बनधी च्वयातःगु (भित्ते लेखज, तिका तःगु पोस्टर, पम्पलेट आदि चिइकेगुलिइ सक्रियता क्यना हःगु खः । अज्याःगु सामग्रीत चिइकेगुलिइ येँ मनपां ध्यान मबिउगु धासें महानगरपालिका विरुद्ध सर्वोच्चय् अवहेलनाया छगू मुद्दा तकं लाःगु खः ।

अदालतया आदेश लिपा येँ मनपां अज्याःगु व्यावसायिक प्रयोजनया निंतिं तयातःगु होर्डिङ बोर्ड, भित्ते लेखन, अंगलय् लाक्वपाक्व तिकातःगु पोस्टर, पम्पलेट चिइकेगुलिइ सक्रियता क्यना हःगु खः । येँ मनपाया प्रवक्ता ईश्वरमान डंगोलं कनादीकथं अज्याःगु होर्डिङ बोर्ड चिइकेत सरोकारवाला निकाययात वंगु सोमवाः छवाःया ई बिउगु खः ।

बिउगु इलय् नं अज्याःगु सामग्रीत चिइकेगु ज्या मयात धाःसा येँ मनपा स्वयम थम्हं चिइकेगु व उकिया वापत लगे जूगु आर्थिक भार सम्बन्धित पक्षं हे फयेमाली ।

२०७६ भदौ १६ गते सर्वोच्चया तात्कालीन प्रधानन्यायाधिश कल्याण श्रेष्ठ व न्यायाधिश ओमप्रकाश मिश्रया मंकाः इजलासं सहरया छेँ, पसः, पल्लि, विजुलीया लठ्ठा, सतकय् च्वंगु डिभाइडर, अंगः आदि थासय् च्वयातःगु व तिकातःगु पोस्टर, पम्पलेट, भित्ते लेखन, अनाधिकृत रुपय् तयातःगु होर्डिङ बोर्ड, विज्ञापन बोर्ड चिइकेगु व हाकनं प्रयोग याके मबीत आवश्यक निवारणत्मक व्यवस्था यायेत आदेश बिउगु खः ।

सम्बन्धित बुखँ

LEAVE YOUR COMMENTS