संकटा त्यात, आर्मी शीर्षस्थानय्

येँ – शहीद स्मारक ए डिभिजन लिग अन्तर्गत शनिवाः जूगु निगू कासाय् छगुली संकटा क्लबं फ्रेन्ड्स क्लबयात बुकूगु दुसा आर्मी व एनआरटी दथुइ जूगु मेगु कासा बराबरीइ क्वचाःगु दु । म्हिगः जूगु कासाय् फ्रेन्डसं सुरुय संकटायात दबाबय् तःगु खःसा गोल यायेमफयेवं १–० गोलं पराजय फयेमाल । न्हापांगु हाफय् दबाबय् लाःगु संकटां निगूगु हाफय् बांलाक म्हितुसें कासाया ६४ आंैं मिनेटय् गोल याःगु खः । सुवास गुरुङ थ्वाःगु फ्रिकिकय् अजायी मार्टिन्स कायोदें हेड पाखें गोल याःगु खः ।

अजायीया थ्व हे छगू गोल संकटाया निंतिं विजयी गोल जुल । थ्व विजय लिपा संकटाया ल्याः १२ जूगु दु । संकटा लिसें न्यागूगु थासय् लानाच्वंगु एनआरटि, जावलाखेलया नं १२–१२ हे ल्याः दु । फ्रेन्डसया धाःसा ११ ल्याः दु ।

मेखे थ्वयां न्ह्यव जूगु आर्मी क्लब व एनआरटी दथुया कासाय् निगुलिं टिमं गोल याये मफयेवं कासा बराबरीइ क्वचाःगु दु । बराबरी जूसां आर्मी ल्याः धलखय् शीर्षस्थानय् थहां वंगु दु । आर्मीया च्यागू कासा लिपा १७ अंकं थ्यंगु दु ।