ने. सं. ११४३ ञलाथ्व चतुर्दशी -

थौं थ्रीस्टार व मनाङया भिडन्त

येँ – शहीद स्मारक ए डिभिजिन लिग अन्तर्गत थौं लिगया दावेदारत थ्रीस्टार व मनाङ्ग मस्र्याङ्गदी दथुइ धेंधेंबल्लाः जुइगु जूगु दु । थनिंनिसें सुरु जुइगु स्वंगूगु चरणया धेंधेंबल्लाः अन्तर्गत थौं थ्रीस्टार व मनाङ्ग आमने सामने जुइत्यंगु खः । स्वंगूगु चरणया धेंधेंबल्लाः थनिंनिसें शनिवाःतक स्वन्हु जुइ ।

स्वंगूगु चरणया कासा अन्तर्गत थौं न्हापांगु कासाय् च्यासल युथ क्लबं एनआरटी (न्युरोड टिम) लिसे धेंधेंबल्लाः याइसा मेगु कासा मनाङ मस्र्याङ्ग व थ्रीस्टार दथुइ जुइत्यंगु खः । आःतक फुक्कं टिमं निगू निगू कासा म्हितेधुंकाः थ्रीस्टार निगुलिं कासा त्याकाः ६ अंक सहित ल्याः धलखय् शीर्ष थासय् दु । मनाङ व संकटाया नं निगुलिं कासा त्याकाः ६–६ अंक हे दुसां गोल अन्तरया ल्याखं थ्रीस्टार शीर्षस्थानय्, थ्वयां लिपा छसिकथं मनाङ मस्र्याङ्गदी व संकटा लानाच्वंगु दु ।

अथेहे नेपाल पुलिस, त्रिभुवन आर्मी, एपिएफ व हिमालयन शेर्पां छगू कासा त्याका व छगू बराबरी म्हिताः समान ४–४ अंक कयातःगु दु । थुपिं क्लब गोल अन्तरया ल्याखं छसिकथं प्यंगू, न्यागूगु, खुगूगु व न्हय्गूगु थासय् दु ।

मच्छिन्द्र क्लब धाःसा निगुलिं कासा बराबरीइ म्हिताः २ अंक सहित च्यागूगु थासय् दुसा छगू बराबरी यानाः छगुलिइ पराजय फःगु च्यासल व एनआरटी १–१ ल्याः कयाः छसिकथं गुंगूगु व झिगूगु थासय् दु । फ्रेन्डस, सरस्वति, जावलाखेल व ब्रिगेड ब्वाइजं धाःसा छगू नं कासा त्याकेफुगु मदुनि ।

झिंप्यंगू टिमं ब्वति कयाच्वंगु थुगुसीया लिगय् राउण्ड रोविन आधारय् मुक्कं ९१ गू कासा जुइ । लिग विजेतायात ५० लाख व उपविजेताया ३५ लाख तका सिरपाः बी ।