केन्याविरुद्ध रोमाञ्चक कासाय् नेपाः ३ विकेटं त्यात

अन्तिम बलय् सोमपालया निगू रन

येँ– आइसिसि वल्र्ड क्रिकेट डिभिजन २ या थौं जूगु कासाय् नेपालं केन्यायात ३ विकेटं बुकल । नकतिनि क्वचाःगु तसकं रोमाञ्चक कासाय् सोमपाल कामीं अन्तिम बलय् निगू रन कासें विजय लक्ष्य पूवंकूगु खः ।

अन्तिम ओभरय् कासा त्याकेत खुगू रन आवश्यक जूगु खः । ओडिम्बोया न्हापांगु बलय् रोहित पौडेलं निगू रन काल, निगूगु बलय् नं रोहित थप छगू रन काल । तर स्वंगूगु बलय् सोमपालं छगू रन काल । तर प्यंगू बलय् रोहित रन आउट जुल । रोहित पवेलियन वनेवं सोमपालयात साथ बीत करण केसी क्रिजय् वःगु खः । थ्व अवस्थाय् तक निगू बलय् निगू रन कायेमाःगु खः । तर न्यागूगु बलय् सोमपालं रन कायेमफुत । अन्तिम बलय् निगू रन काल धाःसा जक त्याइगु स्थितिइ दुगु खः । ओडिम्बोया बलय् सोमपालं आवश्यक निगू रन कासें नामिबियाय् जुयाच्वंगु धेंधेंबल्लाखय् नेपाःयात स्वंगूगु जीत चूलाकाबिल ।

नेपाःया विजयया निंतिं कप्तान पारस खडकाया ब्याटिङ्ग नं महत्वपूर्ण जूगु दु । खड्कां विस्फोटक ब्याटिङ्ग यासें ४४ बलय् ४२ रन थ्वाःगु खः । थुकिया झ्वलय् वं निगू छक्का व स्वंगू चौका थ्वात । अथेहे रोहित व आरिफ शेख नं आवश्यक रन मुनेत ताःलाःगु खः । थुगु धेंधेंबल्लाखय् डेब्यू याःम्ह रोहित अर्धसतक दयेकेत स्वंगू रनं जक लिउने लाःगु खः । व ८६ बल म्हिताः ४७ रन दयेकल । अथेहे आरिफ सेखं ८२ बल म्हिताः ४२ रन थ्वात ।

नेपाःया सुरुवाती ब्याटिङ लाइन धाःसा थ्व पालय् नं खराब हे जुल । ज्ञानेन्द्र मल्ल मुक्कं ९रन दयेकाः आउट जुलसा अनिल साह शून्यय् हे मैदान त्वःतेमाःगु खः ।
थ्व विजय लिसें नेपाः प्यंगू कासाय् स्वंगू त्याकाः ६ अंक सहित निगूगु थासय् दु । थ्व धेंधेंबल्लाखय् शीर्षस्थानय् लाःगु निगू थासय् लाःगु टिमं विश्वकप छनोट कासा म्हितेखनी ।

थौंया कासाय् केन्यां न्हापां ब्याटिङ यासें निर्धातिर ५० ओभरय् च्यागू विकेटया क्षतिइ १७७ रन दयेकूगु खः । नेपाःया निंतिं म्यान अफ दि म्याच सन्दीप लामिछानें न्यागू विकेट कागु खःसा सोमपाल कामी, बसन्त रेग्मी व शरद भेषवाकरं छगू छगू विकेट काःगु खः ।

सम्बन्धित बुखँ

LEAVE YOUR COMMENTS