नेपाः कमजोर कतारपाखें पराजित
येँ – आइसिसी टि–२० विश्वपक एसिया क्षेत्र छनोट अन्तर्गत म्हिगः जूगु थःगु न्हापांगु कासाय् नेपालय् पराजय फयेमाःगु दु । नेपाःयात कमजोर धयातःगु कतारं ४ विकेटं बुकूगु खः । सिंगापुर इन्डियन एशोसियसनया मैदानय् जूगु कासाय् नेपालं टस त्याकाः न्हापां ब्याटिङ्ग याःगु खः । न्हापां ब्याटिङ्ग यासें नेपालं कतारयात मुक्कं १२३ रनया सामान्य लक्ष्य बिउगु खः ।
लिसलय् ब्याटिङ याःवःगु कतारं १९.२ ओभरय् ६ विकेटया क्षतिइ विजय लक्ष्य चूलाकूगु खः । कतारया निंतिं म्हिगः इनाम उल हकं दकलय् अप्वः ४१ रन दयेकलसा कम्रान खानं २२, जाहिर इब्राहिमं १२ व मुहम्मद तनभिरं ११ रन थ्वागु खः । न्हापांगु ब्याटिङ नेपालं धाःसा २० ओभरय् फुक्कं विकेटया क्षतिइ मुक्कं १२२ रन जक दयेकेत ताःलाःगु खः ।
कप्तान पारस खड्का व उपकप्तान ज्ञानेन्द्र मल्लं न्हापांगु विकेटया निंतिं ४९ रनया साझेदार याःगु खः । कप्तान खड्कां मुक्कं २८ रन दयेकलसा उपकप्तान मल्लं २३ रन दयेकल । थ्व धुंकाः सोमपाल कार्मी ११, सन्दीप लामिछानें ९, शरद भेषवाकरं ७ रन दयेकल । नेपाःया निंतिं कतारया बलर इकबाल हुसेन खतरनाक सावित जुल ।
हुसेनं स्वंगू विकेट काःगु खःसा तमोर साजाद व नुमान सर्वारं निगू निगू व इनवाल हुसेनं छगू विकेट काःगु खः । नेपाःया निंतिं सन्दीप लामिछानें ३ विकेट काःगु खःसा करण केसीं छगू विकेट काःगु खः । नेपालं थौं मलेसिया लिसे निगूगु कासा म्हिती । नेपालं छनोटया निंतिं मलेसिया, कतार, सिंगापुर व कुवेत लिसे म्हितीसा थुकी शीर्षस्थानय् लाःगु टिमं विश्वकपया ग्लोबल छनोटय् म्हितेखनी ।
LEAVE YOUR COMMENTS