झिंन्हय्म्हेसित ब्याहा यानाः ठगे याःम्ह ज्वन
एजेन्सी- भारतय् झिन्हय्म्ह मिस्तलिसे ब्याहा यानाः लखौं तका ठगे याःम्ह छम्ह ६६ दँया मिजंयात ज्वंगु दु । उम्ह मिजनं थःत गनं डाक्टर, गनं स्वास्थ्य मन्त्रालयया वरिष्ठ अधिकारी धकाः म्हसीका बियाः मिस्तय्त जालय् तक्यंकाः ब्याहा यानाः ठगे याःगु खँ भारत भुवनेश्वरया प्रहरी अधिकारीं धाःगु दु ।
उम्ह मिजनं भारतया च्यागू राज्यया झिंन्हय्म्ह मिस्तलिसे ब्याहा याःगु खः । थुकी मध्ये ओडिशाया प्यम्ह, दिल्ली व असमया स्वम्ह स्वम्ह, मध्ये प्रदेश व पञ्जाबया निम्ह–निम्ह व उत्तर प्रदेश, झारखण्ड व छत्तीसगढया छम्ह छम्ह मिस्तलिसे ब्याहा याःगु खः ।
उम्ह मिजनं थुपिं झिंन्हय्म्ह मिस्तबाहेक मेपिंत नं फसे याःगु सम्भावना दुगु खँ भुवनेश्वरया डिएसपी उमाशङ्कर दासं धाःगु दु । वय्कलं धाःगु दु, ‘झिंन्हय्म्ह मिस्त ला वयात ज्वनेधुंकाः जक सिल, थ्व बाहेक मेपिंत नं फँसे याःगु दु कि मदु धयागु बारे न्यनेकने जुयाच्वंगु दु ।’
दिल्लीया छगू विश्वविद्यालयय् ब्वंकीम्ह छम्ह मिसा रमेशया अन्तिम शिकार ज ूगु खः । थःत स्वास्थ्य मन्त्रालयया उपमहानिर्देशक धकाः म्हसीका बियाः सन् २०२० य् उम्ह मिसा लिसे ब्याहा याःगु खः । लिपा वं न्हापा हे ब्याहा यानातयेधुंकूगु सिया मिसां प्रहरीइ उजुरी बिउगु खः । प्रहरीइ उजुरी बिइवं उम्ह मिजं बिसिउँ वनाः गुवाहाटीइ च्वंम्ह कलाःलिसे च्वनाच्वंगु खः । न्हय्ला लिपा थःविरुद्ध तःगु उजुरी सामसुम जुल जुइ धकाः भुवनेश्वरय् लिहां वःबलय् वयात ज्वंगु खः ।
ओडिशाया पाटकुराय् च्वंम्ह रमेशं सन् १९८२ य् न्हापांखुसी ब्याहा याःगु खः । न्हापांम्ह कलाःपाखें स्वम्ह काय दुसा स्वम्हं डाक्टर खः, अले उपिं विदेशय् च्वनाच्वंगु दु । न्हापांगु ब्याहा जूगु नीदँ लिपा वं हाकनं ब्याहा यानाः ठगे यायेगु सुरु याःगु खः । न्हापांगु शिकार जूम्ह मिसा झारखण्डया छम्ह चिकित्सक जूगु खँ प्रहरीं धाःगु दु ।
धूर्तम्ह रमेशं मिस्तय्त फँसे यायेत म्याट्रिमोनिअल वेबसाइटया ग्वाहालि काइगु खः । व उगु वेबसाइटय् स्वयाः भचा उमेर वनेधुंकूपिं, याकःमिसा व पारपाचुके कयाच्वंपिं मिस्तय्त ल्ययाः शिकार दयेकेगु यानाच्वंगु खः । थथे शिकार दयेकेबलय् नं मिस्तय् जागिर दुपिं, ध्यबा दुपिं खः कि मखु बांलाक स्वयाः जक फँसे यायेगु यानाच्वंगु खँ प्रहरीं धाःगु दु ।
मिस्तय्त ब्याहा यानाः ठगे यायेगु बाहेक नं वं तःम्ह हे ल्याय्म्हतय्त मेडिकल कलेजय् भर्ना यानाबी धकाः, मेडिकल कलेज चायेकेत स्वीकृति कयाबी धकाः नं ठगे याःगु खः । अथेहे वयात छगू बैंंकं मेडिकल विद्यार्थीतय्त त्यासा बीगु धकाः छगू करोड भारु नं ठगे याःगु द्वपं नं बियातःगु दु ।
LEAVE YOUR COMMENTS