बञ्चरे डाँडाय् फोहोर वायेत ज्या शुरु

येँ – येँ मनपाया मेयर विद्यासुन्दर शाक्य सिसडोलय् च्वंगु ल्यान्डफिल साइतया अवलोकन यानादीगु दु । स्वनिगःया फोहोर व्यवस्थापन याइगु ल्याण्डफिल आः न्हूगु फोहोर वायेगु थाय्या जानकारी कायेत वय्कः शहरी विकास मन्त्रालयया सहसचिव पदम मैनाली सहित अन झाःगु खः ।

बञ्चरे डाँडाया अवलोकन यायेधुंकाः मेयर शाक्य वइगु वर्षा वये न्ह्यः हे फोहोर व्यवस्थापनया ज्या याये कथं पूर्वाधार विकास यायेत मन्त्रालयया अधिकारीयात इनाप यानादीगु खः । वय्कलं सिसडोलय् क्षमता अप्वयेकेगु स्थिति मदु धासें आः तक थःपिंसं उकिया विकल्प नं सोचे मयानागु खँ कनादीगु खः । अथे जुयाः बञ्चरे डाँडाय् याकनं पूर्वाधार दयेकेगु ज्यायात प्राथमिकता बीत नं मेयर शाक्यं बः बियादिल ।

लिसलय् सहसचिव मैनालीं पूर्वाधार दयेकेगु ज्या जुयाच्वंगु खँ कनादिसें थौंकन्हय् अन चा परीक्षण जुयाच्वंगु खँ कनादिल । लिसें सहसचिव मैनालीं निगू प्याकेज दयेकाः ज्या यायेबलय् छम्हेस्यां मेम्हेसिया ख्वाः स्वयाः ज्या यायेबलय् झन जक लिबाइगु जूगुलिं छगू हे प्याकेज दयेकाः ज्या यायेगु सोच दयेकाच्वनागु जानकारी नं मेयर शाक्ययात याकादीगु खः ।

पूर्वाधार तयारी यायेगु झ्वलय् आः अनया न्यागू थासय् ४० मिटर क्वय्या चा परीक्षण जुयाच्वंगु व थुकिं पिहां वइगु लिच्वःया आधारय् डिजाइन बोलपत्र आह्वान जुइगु खँ धाःगु दु ।

मेयर शाक्यं सिसडोलया फोहोर ढुवानी व व्यवस्थापनय् जुयाच्वंगु ज्याया बारे नं जानकारी कयादीगु दु । वय्कःया अवलोकन पुचलय् मनपाया सहसचिव भरत अर्याल, वातावरण व्यवस्थापन समितिया संयोजक विकाश डंगोल, वातावरण विभागया प्रमुख हरिकुमार श्रेष्ठ लिसें सांसद रामवीर मानन्धरपिं नं दुथ्याःगु खः ।

सम्बन्धित बुखँ

LEAVE YOUR COMMENTS