भाय् मथुयाः परिवार नियोजन असफल

येँ – जुम्लाय् स्थानीय जनतां ल्हाइगु भासं खँ थुइके मफयाः सरकारं अन न्ह्याकाच्वंगु परिवार नियोजनया ज्याझ्वः असफल जूगु दु । सरकारं अन स्थानीय जनतायात उमिसं हे थुइगु भासं परिवार नियोजनया थीथी साधन व ज्याझ्वः बारे थुइके मफुगु कारणं यानाः अन बन्ध्याकरण (भ्यासेक्टोमी) याकेगु लागिं मनूत मवःगु खँ धाःगु दु ।

भ्यासेक्टोमी यात धाःसा शरीर ‘स्यनी’ धइगु अन्धविश्वासं यानाः मिजंत छम्ह हे मवःगु खँ धाःगु दु । खास यानाः पुजापाठ यायेमाःपिं स्थानीय लामात शरीरया छुं नं ‘अंग स्यन’ धाःसा पुजापाठ थेंज्याःगु पवित्र ज्या यायेत लायक जुइ मखु धइगु अन्धविश्वासं यानाः भ्यासेक्टोमी यायेत सुं हे मवःगु खँ सीदुगु दु ।

तर परिवार नियोजनया कार्यकर्ता व स्वास्थ्यकर्मीतय्सं धाःसा उमित उमिसं हे थुइगु भासं थुकिया बारे कने मफुगु कारणं स्थानीय मिजंत भ्यासेक्टोमी यायेत मवःगु खँ धाःगु दु । भ्यासेक्टोमी यानाः शरीरया छुं हे अंग स्यनी मखु धइगु खँ उमित स्वास्थ्यकर्मीतय्सं थुइके मफयाच्वंगु खँ नं धाःगु दु । भ्यासेक्टोमी यात धाःसा शरीरया ‘अंग स्यनीगु’ व थुकिं यानाः लामा ज्या याये जी मखु धइगु अन्धविश्वास उमिके दयाच्वंगु खँ नं धाःगु दु ।

अथे खःसां स्थानीय छुं मिसात धाःसा स्थायी बन्ध्याकरणया लागिं वयाच्वंगु खनेदु । तर उपिं नं गुलि मात्राय् वये माःगु खः उलि मवःगु खँ स्वास्थ्यकर्मीतय्सं धाःगु दु । मिजंत धाःसा आः तक छम्ह हे वःगु मदुनि ।

भाषाया हे समस्यां यानाः परिवार नियोजनया कार्यक्रम बांलाक सञ्चालन याये मफयाच्वंगु खःसां उखेपाखे धाःसा छुं नं निकायं ध्यान मबिउगु खँ नं धाःगु दु ।

सम्बन्धित बुखँ

LEAVE YOUR COMMENTS