ने. सं. ११४६ अनलागा षष्ठी -

सुनारं थःगु मोबाइल छाय् मबिउगु ? प्रहरीयात मोबाइल बी माली धकाः रिट तःगु आशंका

येँ – येँया बबरमहलय् च्वंम्ह स्थानीय सरस्वती प्रधानं थःत क्वथा बालं मबिउ धकाः प्रहरीइ उजुरी तयादीम्ह दलित अभियन्ता रुपा सुनारं आः प्रधान विरुद्ध सर्वोच्च अदालतय् हे रिट तयादीगु दु । म्हिगः वय्कलं प्रधान लगायत सरकारी वकिलया कार्यालय व शिक्षा मन्त्री कृष्णगोपाल श्रेष्ठयात समेत विपक्षी दयेकाः रिट तयादीगु खः । तर थ्व विषययात सतिक च्वनाः स्वयाच्वंपिं कानून व्यवसायीतय्सं धाःसा सुनारं तःगु रिट हे दुषित मनसाय तयाः दर्ता जूगु कारणं थुकिया विरुद्ध हे वय्कःयात कारवाही जुइमाःगु बिचाः तयाहःगु दु ।

थ्वहे झ्वलय् विज्ञ सूत्रं धाःकथं रुपा सुनारं थ्व प्रकरणया दकलय् तःधंगु प्रमाण धयातःगु थःगु मोबाइल फोन प्रहरीयात बुझे मयायेगु लागिं थुगु रिट तःगु खनेदु । वय्कलं सरस्वती प्रधान व थः दथुइ जूगु वार्तायात मोबाइल फोन मार्फत रेकर्ड यानादीगु खः । थ्व विषयय् थप अनुसन्धान यायेगु लागिं प्रहरीं वय्कःया मोबाइल बियादिसँ धकाः इनाप याःबलय् वय्कलं मबिउगु खँ सीदुगु दु । अनुसन्धानया लागिं प्रहरीं वय्कःया मोबाइल बी माल धकाः पौ हे च्वयाः इनाप यातं नं सुनारं मोबाइल मबिउगु कारणं वय्कःया नियत शंकास्पद जूगु खँ धाःगु दु ।

थ्व विषययात सतिक च्वनाः स्वयादीम्ह अधिवक्ता जितेन्द्र वज्राचार्यं कनादीकथं सुनारं थःगु मोबाइल प्रहरीयात मबिउगु खँ हे शंकास्पद जूगु दु । सुनारया मोबाइलय् थ्व प्रकरण सम्बन्धी मेमेगु नं आपालं खँ लानाच्वंगु दयेमाः, अज्याःगु खँ पिहां वइ धकाः हे वय्कलं मोबाइल मबिउगु जुइफु । मखुसा थम्हं हे तयागु उजुरीया बारे जुइगु अनुसन्धानयात ग्वाहालि यायेगु लागिं वय्कलं मोबाइल बीत आनाकानी यायेमाःगु आवश्यकता मदुगु खँ नं अधिवक्ता वज्राचार्यं कनादीगु दु ।

अथे हे मेम्ह अधिवक्ता जुजुकाजी महर्जनं प्रहरीयात थःगु मोबाइल मबीगु लागिं हे सुनारं थ्व रिट तःगु आशंका यानादीगु दु ।

अथे हे सुनारं ‘प्रमाण नष्ट याये फुगु जूगुलिं सरस्वती प्रधानयात ज्वनेमाः’ धकाः याःगु दावी नं पाय्छि मजूगु खँ अधिवक्ता महर्जनं कनादिल । थ्व सम्बन्धी प्रमाण ला सुनारयाके जकं दु, प्रधानयाके छुं नं मदु, उकिं प्रधानं प्रमाण नष्ट याइ धायेगु छुं हे कथं पाय्छि मजूगु खँ महर्जनं कनादिल ।

सुनारं थःगु मोबाइलय् रेकर्ड जुयाच्वंगु खँत डिलेट हे याःसां माल धाःसा उकियात पिकाये जिउगु जुयाः वय्कलं प्रहरीयात मोबाइल मबिउगु अनुमान जुयाच्वंगु दु । सुनारं थःगु गोपनीयताया हक खः धासें प्रहरीयात मोबाइल मबिसे च्वनाच्वंगु खः । विज्ञतय्सं धाः कथं यदि सुनारयात थःगु प्रमाण प्रहरीं हुया छ्वइ धइगु आशंका दुसा वय्कलं उकिया छगू ब्याकअप थःके तयाः मोबाइल प्रहरीयात बिउसां जिउगु खः ।

प्रहरीइ उजुरी लायेधुंकूगु मुद्दाय् महान्यायाधिवक्ता छम्ह बाहेक मेपिं सुनां धाःसां नं त्वःते फइगु व्यवस्था मदुगु जुयाः मन्त्री कृष्णगोपाल श्रेष्ठं सरस्वतीयात त्वःता हल धाये फइगु छुं हे कानुनी आधार मदइगु खँ नं धाःगु दु । मन्त्री श्रेष्ठं ला सरकारी वकिलया कार्यालयं त्वःता हयेधुंकूम्ह प्रधानयात थःगु गाडीइ तयाः छेँय् तक त्वःता बिउगु जक खः । सुनारं आः तःगु रिटय् मन्त्री श्रेष्ठ सरकारी वकिलया कार्यालयय् तकं वंगु दु धकाः जिकिर याना तःसां मन्त्री श्रेष्ठ सरकारी वकिलया कार्यालयय् वंगु मदु, बरु प्रहरी चौकीइ जक वंगु जूगुलिं वय्कःया रिट पाय्छि मजूगु खँ धाःगु दु । अथे हे बबरमहलया छेँ सरकारी प्रधानया जहानया नामय् दुगु जुयाः सरस्वतीयात घरधनी धकाः द्वपं बिउगु नं पाय्छि मजूगु खँ कानून व्यवसायीतय्सं धाःगु दु ।