रोनाल्डोयात मिइगु तयारीइ युभेन्ट्स

एजेन्सी- इटालियन क्लब युभेन्ट्सं पोर्चुगलया स्टार कासामि क्रिष्टियानो रोनाल्डोयात मिइगु तयारी याःगु दु । युभेन्ट्स व रोनाल्डाया दथुइ दछिया सम्झौता ल्यंदनिगु खःसां बांलाःगु मू वल धाःसा युभेन्ट्स रोनाल्डोयात मिइत तयार खनेदु । रोनाल्डोयात न्यायेत दकलय् न्ह्यःने वयाच्वंगु नां म्यानचेस्टर सिटी व पिएसजी खः । युभेन्ट्सं रोनाल्डोयात स्वंगू करोड युराें मिइत स्वयाच्वंगु दु ।

क्रिष्टियानो रोनाल्डो नं क्लब त्वःतेगु पक्षय् दु । स्पेनिस वेबसाइट मार्काया कथं रोनाल्डाें थुकियात कयाः युभेन्ट्सया प्रशिक्षक मास्मिमिलिआने एलिग्री व टेक्निकल डाइरेक्टर पाभेल नेदभेदलिसे खँ ल्हायेधुंकूगु दु । रोनाल्डाें क्लबया मेपिं कासामितय्त थःम्हं क्लब त्वःतेगु खँ धाःगु खः ।

रोनाल्डो सन् २०१८ य् युभेन्ट्सय् वंगु खःसा रोनाल्डाें वंगु सिजनय् क्लबया निंतिं ३३ गू कासा म्हिताः २९ गोल याःगु खः ।