क्रिकेटय् नेपाःया कीर्तिमान विजय

येँ – झिंस्वक्वःगु दक्षिण एशियाली कासा (साग)य् म्हिगः जूगु क्रिकेटय् नेपालं न्हूगु कीर्तिमान सहित विजय चूलाकूगु दु । किपूया त्रिभुवन विश्वविद्यालयया मैदानय् जूगु कासाय् भूटानयात १३० रनया तःधंगु रनं बुकेगु झ्वलय् नेपालं ट्वान्टी ट्वान्टीया अन्तर्राष्ट्रिय क्रिकेटय् आःतकया दकलय् अप्वः रन दयेकेगु कीर्तिमान नं तल ।

नेपालं म्हिगः कप्तान ज्ञानेन्द्र मल्लया सतक सहित २० ओभरय् स्वंगू विकेटया क्षतिइ २३६ रन दयेकूगु खः ।थुकिया निंतिं कप्तान मल्लं १०७ रनया योगदान बिल । मल्लं ५५ बलय् १०७ रन दयेकूगु खः, गुगु नेपाली कासामिया ट्वान्टी ट्वान्टीया अन्तर्राष्ट्रिय क्रिकेटय् आःतकया उच्च स्कोर नं खः ।

कप्तान मल्ल लिसें ब्याटिङ याःवःम्ह पुलांम्ह कप्तान पारस खड्कां नं अर्धसतक दयेकल । खड्कां २८ बलय् ९ चौका व छगू छक्का सहित ५७ रन दयेकूगु खः । कप्तान मल्लं १७.४ ओभरय् ५३ बल म्हिताः सतक पूवंकूगु खः । थ्व लिपा टोब्देन सिङेया बलय् क्याचआउट जुल ।नेपाःया निंतिं दीपेन्द्र सिंह ऐरीं २७ बलय् प्यंगू चौका व निगू छक्का सहित अविजित ४५ रन दयेकूगु खःसा आरिफ शेख ४ रन दयेकाः अविजित जुल । अथेहे रोहित पौडेलं ६ रन दयेकल ।

मेखे तःधंगु लक्ष्यसहित मैदानय् कुहां वःगु भूटानया ब्याटिङ्ग सुरुं निसें हे कमजोर जुल । भूटानया निंतिं दकलय् अप्वः रन्जुङ दोर्जीं २३ बलय् २७ रन दयेकूगु खः । भूटानी ब्याट्सम्यानत असफल जुइवं नेपालं १३० रनया तःधंगु अन्तरं विजय चूलाकूगु खः । नेपाःया निंतिं रनया ल्याखं नं थ्व आःतकया दकलय् तःधंगु विजय नं खः । नेपाःया निंतिं पारस खड्कां निगू, करण केसी, ललितनारायण राजवंशी व पवन सर्राफं छगू छगू विकेट काःगु खः ।